Na 2023 lo no tin plachi nobo tampoco di vehiculo di motor

ORANJESTAD – Contrario na loke a wordo bisa na 2021, pa 2023 lo no tin plachi di number di auto nobo pa 2023. Esaki kier men cu pa 2023 tambe mester sigui usa e plachi cora cu blanco cu a keda emiti na 2020. Asina vocero di departamento di impuesto, Meverly Romano a bisa diahuebs den un conferencia di prensa. Motibo duna ta cu no tin fondo necesario aworaki pa haci e cambio. Hopi ta ‘contento’ cu e decision mirando cu ta considera e cambio di plachi un perdida di placa y material, y cu mester cuminsa usa manera otro paisnan, sticker of otro forma pa actualisa e pago di impuesto di vehiculo di motor. 

LO TABATIN NOBO NA 2023

Na fin di September 2021, e director di DIMP Luenne Gomez a bisa e portal aki cu pa 2023 lo tin plachi di number nobo di auto. Pero  mescos cu Romano a bisa na November di 2020, e mesun motibo ta wordo usa aworaki, esta falta di fondo. E plachi actual ta data for di 2020. 

PAGO AWE CABA

Loke si ta positivo, ta cu entrante awe caba 15 di September 2022, por cuminsa paga pa e plachi pa otro aña. Esaki ta un adelanto tambe ya cu aña pasa por a cuminsa paga e plachi for di 7 di October pa e aña siguiente. Pues e biaha aki a adelanta e fecha cu un luna casi, dunando e usuario hopi mas tempo pa cumpli cu e pago.