Gomez: Automobilistanan lo haya plachi nobo te na 2023 atrobe

ORANJESTAD – Pa 2023 automobilistanan tin plachi ‘nobo’ di auto atrobe. Asina director di Departamento di Impuesto mr. Luenne Gomez-Pieters a recorda noticiacla diabierna mainta. Tin basta pregunta kico lo a pasa ora cu aña bolter aki 3 luna, cu si tin plachi nobo of no. Pero sra. Gomez a recorda cu tabata na 2020 cu a anuncia cu e plachinan cora cu blanco, emiti na 2020 lo tin un duracion di 3 aña. “Nos a geef aan cu e plachi di 2020 ta conta pa tres aña” sra. Gomez a bisa atrobe. Pues ora di cambio di aña, solamente lo mester paga pa e impuesto di vehiculo di motor, pero no pa plachi nobo.

PLACHI MAS MODERNO

Por corda con varios aña pasa, for di tempo cu tabatin ex minister Angel Bermudez den gabinete Mike Eman II, cu tabata papia di cambio di plachi di number pa haci esaki mas moderno y pa paga den forma di accijns. Lo a usa un plachi mas moderno, cu no mester cambia fisicamente mas, y lo tin basta ‘features’, cu ta duna polis y otro instancia cu tin cu controla, un miho bista. Y lo evita tambe cu tur aña tin cu para den rij pa haya plachi. Esey no a logra y a keda cu un plachi pa algun aña (esun blauw). Despues a bin cu un plachi nobo na 2020, cu ta diferente, reflectivo y cu den practica, ta miho pa control riba caya.