Tankinan historico di Kibaima lo bira centro pa Archivo Nacional

ORANJESTAD — E tankinan historico di awa na Kibaima lo haya un funcion nobo como futuro hogar di Archivo Nacional Aruba y como centro di conocemento y patrimonio.

Durante un ceremonia oficial, Pais Aruba y Stichting Monumentenfonds Aruba a firma un Erfpachtovereenkomst y un Samenwerkingsovereenkomst, marcando un siguiente paso den restauracion y reutilisacion di e monumentonan.

Prome Minister Mike Eman, kende tambe ta carga responsabilidad pa Cultura, a destaca e balor historico y simbolico di e proyecto. E tankinan, cu casi un siglo pasa tabata forma parti di infraestructura pa garantisa suministro di awa, awor lo contribui na conserva memoria y conocemento di Aruba.

“E ta conecta nos cu e historia di ken nos ta, di unda nos a bin,” Eman a expresa.

Director di Archivo Nacional Aruba, Raymond Hernandez, a indica cu despues di alrededor di 30 aña buscando un localidad adecuado, Kibaima por finalmente brinda e espacio necesario pa conserva documento, potret, video, audio, mapa, buki y otro material historico.

E vision ta pa e sitio bira un centro accesibel pa comunidad, scolnan, studiante, docente y investigador.

Minister Rene Herdé a señala cu e proyecto ta duna e monumento un segundo bida, mientras cu Directora di Monumentenfonds Petra Davis a splica cu restauracion lo tuma luga den diferente fase, respetando tanto e balor monumental como e exigencianan di un archivo moderno.

Gobierno Hulandes ta brinda sosten financiero pa e proyecto.

Cu e acuerdonan firma, Kibaima ta pasa di un lugar cu antes tabata conserva awa, pa un lugar cu lo conserva historia, memoria y conocemento pa siguiente generacionnan.