Bureau Traimerdia celebra 30 aña di servicio na muchanan

ORANJESTAD — Bureau Traimerdia a celebra su 30 aniversario, marcando tres decada di dedicacion na bienestar y desaroyo di muchanan despues di ora di scol.

E aniversario tabata un oportunidad pa honra e historia di e organisacion, reconoce tur hende cu a contribui na su desaroyo y celebra e team cu diariamente ta traha cu compromiso y dedicacion.

Como parti di e celebracion, Bureau Traimerdia, den colaboracion cu Departamento di Recurso Humano (DRH) y Departamento di Asuntonan Social (DAS), a organisa un workshop special tocante salud mental y bienestar. E meta tabata crea espacio pa reflexion y enfatisa importancia di cuida bienestar di profesionalnan den un organisacion fuerte y sostenibel.

Despues di 30 aña, e organisacion ta mira atras cu orguyo riba loke a logra y ta sigui dilanti cu compromiso pa continua sirbi muchanan di Aruba.