Homber ta perde su bida den accidente cu quadracer na Parkietenbos

ORANJESTAD — Giovanny Rafael Dirksz, di 51 aña, a perde su bida diasabra atardi den un accidente cu quadracer na altura di dump na Parkietenbos. Segun Cuerpo Policial Aruba, esaki ta e di 15 accidente fatal den trafico pa 2026.

Central di polis a ricibi e aviso pa 3:26 di atardi y a despacha un patruya y ambulance na e sitio. Ora polisnan a yega, nan a topa e homber riba caminda, den estado grave y sin reacciona. Segun e informacion preliminar, e tabata e chauffeur di e quadracer.

Personal di ambulance a brinda asistencia medico, pero lamentablemente no por a salba su bida. Dokter Rivera a constata morto pa 4:45 di atardi. Dirksz a nace na Aruba dia 25 di maart 1975.

Specialistanan di trafico y polis forensico a presenta pa investiga e circunstancianan di e accidente. E causa ainda no a wordo informa.

Departamento di Slachtofferhulp a brinda apoyo na famia di e victima. Cuerpo Policial Aruba a expresa su condolencia na famia y sernan stima di Dirksz.