Aruba buscando hospedahe pa 1.200 turistanan afecta pa paro di buelo na Merca

ORANJESTAD — Gobierno di Aruba ta coordina un operacion pa busca hospedahe pa entre 1.500 y 1.900 turista cu, segun calculo preliminar di prome minister Mike Eman, no por a sali pa Merca diabierna debi na e suspension di salida di vuelonan ordena pa FAA. Hotelnan, Airbnbs y, como alternativa di emergencia, salanan grandi cu camanan provisional ta entre e opcionnan cu ta wordo evalua.

Den un declaracion na Noticiacla, prome minister a splica cu e prioridad ta determina cuanto turista a keda na Aruba y unda tin espacio pa nan pasa anochi. E operacion ta wordo coordina cu e sector turistico y e team di crisis management reuni na CMO.

“Nos no ta laga nan pa nan mes busca. Nos ta traha sistematicamente pa nos por yuda ubica e turistanan aki, sea den hotel, si tin espacio, of den Airbnbs,” prome minister Eman a declara. E mandatario a bisa cu e problema ta presenta un reto adicional pasobra algun hotel por ta yen caba cu otro turistanan cu a yega. P’esey, e buskeda di hospedahe ta wordo ehecuta cu ayudo di AHATA y otro contacto den e sector. “Ta wordo haci un investigacion di cuanto a keda na Aruba y unda por ubica nan,” el a indica. Segun su splicacion, e contacto directo cu AHATA ta permiti obtene un bista di e disponibilidad den hotelnan, mientras ta wordo haci yamadanan na otro lugarnan di hospedaje.

Si e capacidad den hotelnan y Airbnbs resulta insuficiente, e team tin varios alternativa di emergencia riba lista. Prome minister a menciona salanan grandi di hotel, convention centers, aeropuerto y Centro Deportivo Betico Croes como posibel ubicacion pa instala camanan provisional. E opcionnan aki ta forma parti di e plan di reserva; su declaracion no ta confirma cu nan a wordo activa caba.

Segun prome minister, e rol di Gobierno ta pa organiza y coordina e maneho di crisis, hunto cu e instancianan y representantenan di sector turistico. “Nos tin cu coordina e esfuerzo pa busca un caminda sigur y hospitalario pa e 1.500 of 1.900 turistanan,” el a expresa, enfatizando cu e atencion mester refleha e hospitalidad pa cual Aruba ta conoci.

Tocante e posibilidad cu e interrupcion por sigui afecta e weekend, prome minister a splica cu e falta di buelonan entrante for di Merca por limita e presion adicional riba e capacidad di hospedahe. Sinembargo, yegada di turistanan for di otro pais ainda por representa un reto. E prioridad inmediato, segun e mandatario, ta atende e personanan cu a keda riba e isla, hunto cu esunnan cu a yega, y busca un solucion pa nan pasa anochi na un manera sigur.