Tromp: “Sentencia contra Otmar Oduber ta confirma cu mi denuncia no tabata falso”

ORANJESTAD — Ex minister Marisol Tromp a reacciona riba e sentencia dicta ayera contra ex minister Otmar Oduber den caso Flamingo. Segun Tromp, e decision di Gemeenschappelijk Hof van Justitie ta confirma cu e denuncia cu el a haci contra Oduber no tabata falso, manera e ex minister a sostene publicamente durante añanan. Tromp a publica su reaccion bou di e pregunta: “Ken a keda ‘na filingrana’ awe?” riba su pagina personal di Facebook diahuebs anochi. 

CASO FLAMINGO

Caso Flamingo ta relaciona cu investigacion penal riba actuacion di Oduber durante su periodo como minister den Gabinete Wever-Croes entre 2017 y 2019. E caso ta inclui irregularidad relaciona cu reparticion di tereno, nombramento di ambtenaar Spirito — kende, segun e acusacion, tabata cobra sin traha pa Gobierno — y trato preferencial pa cierto persona.

Den prome instancia, Corte a condena Oduber na un aña di prizon. Oduber a apela e sentencia, sosteniendo cu e ta inocente y cu acusacionnan contra dje tabata basa riba calumnia.

Sinembargo, den apelacion, tres huez di Hof a considera cu e castigo di un aña no tabata suficiente. Nan a aumenta e sentencia na dos aña di prizon y a impone un prohibicion di cinco aña pa Oduber figura riba lista di un partido politico of ocupa un funcion publico.

REACCION DI TROMP

Den su reaccion, Tromp ta acusa Oduber di haber manipula opinion publico y lastra su nomber durante seis aña. “Ex minister Otmar Oduber a keda manipula pueblo y lastra mi nomber den tur entrevista cu el a duna, pa seis aña largo, como si fuera cu mi a entrega un keho falso contra dje,” Tromp a declara.

REVELACION DEN PARLAMENTO

E ex minister Tromp a recorda cu na 2020 el a revela den Parlamento loke, segun e, tabata irregularidadnan cometi door di Oduber. Tromp ta sostene cu despues di su presentacion den Parlamento, el a wordo baha como minister.

Pa Tromp, e reciente sentencia ta rehabilita su credibilidad y ta desmenti e acusacion repetidamente haci contra dje.

“E sentencia aki ta confirma cu mi no a haci un ‘valse aangifte’ contra exminister Otmar Oduber, manera cu semper el a pretende den medionan di comunicacion pa añanan largo.”

Tromp a conclui cu, contando e huez di prome instancia y e tres hueznan di apelacion, un total di cuater huez a determina cu Oduber merece un castigo di prizon.

E sentencia den apelacion ta considerablemente mas pisa cu esun di prome instancia: dos aña di prizon y cinco aña di prohibicion pa participa como candidato politico of traha pa Gobierno. Oduber ainda por recurri na casacion, unda Corte Supremo lo evalua si ley y procedimiento a wordo aplica correctamente.