DVG ta registra aumento di griep y malesa respiratorio

ORANJESTAD — Directie Volksgezondheid (DVG) a informa cu Aruba ta registrando un aumento den casonan di keintura, sintomanan respiratorio y malestar gripal. Tambe a confirma casonan di influenza tipo B.

DVG ta pidi atencion special pa personanan mas vulnerabel, entre otro adulto di 60 aña y mas, mucha bou di 5 aña, hende muhe na estado y persona cu malesa cronico of sistema inmunologico debilita. Nan ta wordo recomenda pa laba man frecuentemente, evita contacto cu hende malo, sigui nan tratamento y considera vacuna contra influenza.

E vacuna ta disponibel na Seccion di Malesanan Infeccioso di DVG. Pa mas informacion por yama 522-4200.

Persona cu keintura, tosamento, dolor di garganta, dolor di curpa, cansancio of otro sintoma gripal mester keda cas, limita contacto cu otro y evita bishita personanan vulnerabel. DVG tambe ta recomenda bon ventilacion, suficiente likido y descanso.

Antibiotica no ta funciona contra virus manera influenza y no mester wordo usa sin indicacion medico. Tuma contacto cu dokter di cas si sintomanan empeora of keintura persisti. Busca asistencia urgente si tin dificultad pa hala rosea, dolor of presion fuerte den pecho, confusion, debilidad severo of deterioro rapido.

DVG ta enfatisa cu preveni propagacion di malesanan respiratorio ta un responsabilidad comparti: si bo ta malo, keda cas, cuida bo mes y proteha otro.