AF&BA ta investiga falta di personal y capacidad turistico den sector F&B

ORANJESTAD — Aruba Food & Beverage Association (AF&BA) a lansa su Encuesta 2026 di Fuerza Laboral y Capacidad di Carga, cu meta di midi falta di personal, necesidad di capacitacion y e cantidad di bishitante cu e sector di cuminda y bebida por atende di forma sostenibel.

E investigacion ta wordo realiza den colaboracion cu VIAMOON Consultancy y Connect2Teach.us, cu patrocinio di Aruba Tourism Authority. Tanto miembronan como establecimentonan cu no ta miembro di AF&BA por participa. E encuesta ta anonimo y confidencial.

Segun AF&BA, empresanan den sector ta indica pa tempo largo cu nan ta lucha pa haya suficiente personal. Sinembargo, te awor e magnitud di e problema y su efecto riba operacion, crecimiento y capacidad turistico no a wordo midi sistematicamente.

E resultadonan mester duna un imagen mas cla di disponibilidad di talento, vacaturanan, confianza empresarial, preocupacionnan y expectativa di crecimiento. Nan lo sirbi tambe como base pa capacitacion, desaroyo di talento y colaboracion cu stakeholdernan relevante.

AF&BA ta proyecta ademas un plataforma nobo pa trabou y contratacion, pa conecta empresanan miembro cu potencial empleadonan y facilita yena vacaturanan.

E encuesta ta dura entre 8 y 12 minuut y ta disponibel tanto fisicamente como digitalmente. E resultadonan lo wordo presenta den un informe formal pa AF&BA, su partnernan y otro stakeholdernan di industria.