DIMP: No ta otorga plachi nobo pa 2021 sino lo uza di 2020

ORANJESTAD – Pa aña 2021 departamento di impuesto DIMP no ta otorga plachi di number nobo. Asina vocero di e departamento, Meverly Romano a bisa durante un conferencia di prensa diaranzon mainta. Motibo principal ta falta di fondo y prioridad pa inverti den e proyecto aki e aña aki. Esaki ta nifica cu e aña 2021, lo sigui uza e mesun plachi di 2020, y lo no tin un sticker pa specifica si a paga of no. Como tal tambe, lo no cobra e suma di e plachi, esta e 20 florin extra, sino solamente e suma di impuesto cu e cliente debe pa e aña. Pues lo paga e impuesto pa 2021, pero lo keda uza e plachi di 2020. Algo cu a sosode den pasado caba ora cu tabatin e uso di plachi di e aña anterior y esaki a bay te hasta 3 aña largo (plachi blauw). Si tin hende cu ta haya auto nobo, lo e haya un plachi di aña 2020, pues di e colornan di e aña aki, y tin cu paga e plachi e ora si di 20 florin fuera di e impuesto regular. Ora cu paga number di auto pa aña 2021, lo no controla seguro tampoco.