Vroegop ta sostene paro: “Pashentnan no mester bira victima di e wega financiero”

ORANJESTAD — Director di Horacio Oduber Hospital (HOH), Jacco Vroegop, ta sostene e paro di trabao di dos ora cu personal di hospital a tene diaranson mainta. Den un reaccion na Noticiacla, el a declara cu e preocupacion di trahadonan ta hustifica, mientras hospital ainda no tin claridad tocante su financiamento y ta enfrenta e posibilidad di nobo problemanan di liquidez na december. “Mi ta compronde e paro y mi ta sostene nan,” Vroegop a declara. “E personal tin tur rason. Pashentnan no mester bira victima di e wega cu ta wordo hunga cu e finanzas.”

VOORSCHOT DI AZV

Segun Vroegop, e voorschot cu hospital a ricibi siman pasa tabata esencial pa paga obligacionnan y mantene suficiente material pa sigui brinda cuido durante e proximo simannan. Sinembargo, e a enfatisa cu e pago ta keda un adelanto, mientras hospital ta busca un likidacion pa cuido cu ya a wordo brinda. E director a splica cu hospital a brinda mas cuido, particularmente cuido agudo, incluyendo cirugia y dialisis: servicionan cu no por wordo rechasa. Na mes momento, gastonan a subi pa motibo di productonan mas caro, diferencianan di cambio, carganan na frontera y e mantenecion di edificionan mas grandi. Segun dje, e aumentonan aki no a wordo incorpora debidamente den e tarifanan.

PREOCUPACION PA DECEMBER Y BONUS DI PERSONAL

Vroegop a indica cu AZV kier cuminsa desconta e voorschotnan atrobe na december. Si esey sosode, segun su calculo, hospital lo resta cu apenas suficiente placa pa paga salario, cu poco espacio pa otro gastonan operacional. E incertidumbre ta afecta tambe e posibilidad di paga e bonus di prestacion na final di aña. Segun Vroegop, e pago aki ta depende di e salud financiero di e organisacion y actualmente no tin garantia cu lo por hacie. “Esey ta duro pa e hendenan, pasobra nan ta haci un esfuerso enorme,” el a declara. E director a enfatisa cu retencion di personal ta esencial, teniendo cuenta cu Aruba tin un cantidad limita di profesional den cuido y cu ta bira cada biaha mas dificil pa atrae personal for di exterior.

ACUSACION DI REK E ASUNTO Y TARDA CU UN SOLUCION.

Vroegop a declara cu hospital ta trata desde hopi tempo pa yega na acuerdonan cu AZV tocante volumen, prijs y calidad di cuido, haciendo referencia na articulo 39 di e Landsverordening AZV. Segun e, AZV ta nenga pa haci e acuerdonan aki y Minister di Salud no kier usa articulo 2a pa duna un aanwijzing. E director a critica e decision pa sigui haci investigacion, cual, segun e, ta costa tempo y placa mientras e problema ta sigui. “Ta un tactica di rek e asunto y tarda cu un solucion. conoci cu den e caso aki ta bai na costo di poblacion y nos profesionalnan di cuido,” Vroegop a declara. El a rechasa tambe e critica cu hospital lo a administra placa malo of a tuma decisionnan robes. Segun Vroegop, hospital a entrega   informacion financiero amplio, a laga haci un comparacion externo di costo y ta wordo controla pa un accountant externo. El a agrega cu un investigacion di Deloitte, solicita pa AZV, a mustra un necesidad financiero mas grandi cu hospital mes a calcula inicialmente.

MATERIAL TA FALTA Y SERVICIO AINDA TA LIMITA

Segun Vroegop, tin momento cu cierto producto ta caba, pashentnan mester warda mas largo y ainda no tur capacidad di cuido ta habri. E falta di claridad tocante e entradanan di december ta impidi hospital amplia su servicio cu confianza. E director a expresa gratitud pa e pagonan cu a yuda alivia e presion inmediato, pero a enfatisa cu adelantonan cu despues mester wordo compensa no ta un solucion structural. “Nos ta lucha pa un organisacion cu ta brinda cuido na poblacion di Aruba,” el a declara, señalando cu hospital mester ta prepara tambe pa e demanda di cuido di turistanan durante temporada halto. Vroegop a conclui cu minister y AZV mester tuma responsabilidad y trece claridad. “Nos como hospital ta decepciona cu esaki ta dura asina largo y cu ainda nos no tin claridad.”