Opinion: Horacio Oduber Hospital of Hospital Horacio Oduber?

Scirbi pa Fundacion Lanta Papiamento! 

Fundacion Lanta Papiamento (FLP) ta bin dilanti aki cu un keho concreto.

For di aña 2003 Papiamento ta idioma oficial na Aruba, banda di Hulandes.

Pero nos NO ta ripara esey den comunidad. Aplicacion di e ley aki te ainda ta manera algo boluntario. No tin control oficial riba e ley aki den nos comunidad, ni den gobierno, ni den comercio, ni den enseñansa, niun caminda den comunidad. Ora tin violacion contra e ley aki, ta poco hende ta ripara esey.

Durante sigur 17 aña Fundacion Lanta Papiamento (FLP) a publica hopi articulo y a organisa diferente actividad pa pone enfasis riba e balor di nos idioma Papiamento. Awe nos ta publica algun potret cu ta demostra e falta di respet y e falta di reconocemento di Aruba su cultura y tambe un falta grandi di orguyo. Nos Hospital Horacio Oduber ta manera un hospital na Merca.

Pasobra ki mishi ta pone na entrada MAIN ENTRANCE, solamente na Ingles? Y con ta posibel cu tur departamento den e hospital tin nomber na Ingles so? Mira algun potret cu ta ilustra e fenomeno aki. Ta pa ken e hospital ta na prome luga? 

FLP ta conseha cu enfasis pa coregi e pifia aki y pone e nombernan na Papiamento tambe y na prome luga. 

Por ehempel ENTRADA PRINCIPAL y bou di esey MAIN ENTRANCE.   

Kisas mester di conseho? Tin diferente instancia cu por yuda haya e palabranan y formulacion corecto na Papiamento. Esey ta importante,  entre otro pa evita un vupa  manera den e frase: Danki pa contribui na un Hospital liber di huma. Kico HOH kiermen cu ‘liber di huma’? Kico ta e mensahe cu HOH kier a duna?

Djis pensa un rato!