Crisis den coalicion hulandes despues di acuerdo di impuesto sin VVD

DEN HAAG — Tension den coalicion gubernamental di D66, VVD y CDA a aumenta considerablemente diaranson despues cu D66 y CDA a logra un acuerdo cu partidonan di oposicion Pro y Volt tocante cambionan den plan di impuesto, sin participacion directo di VVD.

Despues di negociacionnan cu a dura te 3'or di mainta, D66, CDA y Pro a logra un compromiso cu ta contempla un aumento di impuesto di un mil miyon euro pa personanan cu patrimonio grandi, combina cu un reduccion di un mil miyon euro di impuesto pa personanan cu ingreso regular.

Lider di VVD, Dilan Yesilgöz, y presidente di fraccion Ruben Brekelmans a wordo informa solamente despues cu e acuerdo a keda logra. Segun personanan envolvi, e noticia no a cay bon cerca di VVD, cu awor ta deliberando internamente tocante su reaccion.

D66 y CDA ta reconoce cu e maniobra por causa daño serio na relacionnan den coalicion, pero ta argumenta cu e acuerdo tabata necesario pa evita cu e plan di impuesto cay.

“Esaki ta laga rasguñonan”, un persona envolvi a declara, refiriendo na e consecuencia politico.

E situacion ta pone tambe presion riba gabinete di premier Rob Jetten. Durante e debate parlamentario di mañan, e premier probablemente lo enfrenta preguntanan critico tocante estabilidad y futuro di su Gobierno.