Wever-Croes: “Jetten no a contesta nos preguntanan. MEP ta mantene su exigencia”

ORANJESTAD — “Jetten no a contesta nos pregunta. Jetten a papia di specula.” Cu e palabranan aki, lider di MEP y ex Prome Minister Evelyn Wever-Croes a reacciona na Noticiacla riba e declaracion di Prome Minister Hulandes Rob Jetten, kende diaranson a pidi pa evita speculacion tocante e anotacionnan personal di anterior Reina Beatrix riba Betico Croes y e lucha pa Status Aparte di Aruba.

EVITA SPECULACION

Segun Wever-Croes, precisamente pa evita speculacion MEP a pidi Gobierno di Aruba pa exigi aclaracion oficial di Gobierno Hulandes. “Nos a bisa desde un principio cu juist pa evita speculacion nos ta exigi di nos gobierno pa haya aclareacion di gobierno hulandes. Dus nos ta keda para riba nos peticion,” Wever-Croes a declara.

JETTEN NO KIER INTERPRETA E NOTANAN

Durante un debate den Tweede Kamer tocante presupuesto di Rey pa 2027 diaranson, Jetten a reacciona na preguntanan di parlamentario Hulandes Tijs van den Brink, kende a expresa preocupacion tocante e conmocion cu publicacion di e notanan a causa na Aruba. Jetten a enfatisa cu Beatrix semper a demonstra un gran dedicacion na e islanan Caribense di Reino, particularmente Aruba. Sinembargo, tocante e significado di e anotacionnan, Jetten a bisa cu e contexto completo den cual nan a wordo skirbi no ta conoci, y pa e motibo ey e no kier specula tocante nan intencion. E prome minister Hulandes a confirma cu el a papia tocante e asunto cu representantenan di Aruba, pero sin revela cu ken ni kico exactamente a wordo discuti. 

MEP KIER SA KICO BEATRIX TABATA KIERMEN

E controversia ta draai rond di un anotacion personal di Beatrix for di añanan ochenta, cu ta bisa: “Tijd winnen! Hij zal eens wegvallen. Dat afwachten.” E palabranan aki a lanta preguntanan serio na Aruba, especialmente tocante e significado di expresion wegvallen den contexto di e lucha di Betico Croes pa Status Aparte. Wever-Croes a enfatisa cu MEP no ta saca conclusion tocante e intencion di Beatrix, sino ta exigi claridad riba kico tabata kiermen cu e anotacion, cua informacion tabata disponibel na e momento ey y si tabatin algun scenario of draaiboek prepara pa elimina Betico Croes como figura politico. Te awor, no a presenta evidencia cu ta comproba cu e anotacion tabata referi na un plan pa elimina Croes fisicamente. Pero segun MEP, precisamente e falta di contexto ta haci un aclaracion historico necesario.

MEP A TUMA VARIOS PASO CABA

E reaccion di Wever-Croes no ta e prome accion di MEP riba e asunto. Dia 8 di oktober, Wever-Croes a expresa publicamente su preocupacion tocante e anotacionnan y a anuncia cu fraccion di MEP a solicita, via Gobierno di Aruba, aclaracion di Gobierno Hulandes. Despues, dia 22 di oktober, fraccion di MEP a manda un carta di recordatorio na Prome Minister Mike Eman, insistiendo pa Gobierno actua y busca contesta na Den Haag.  Awor, segun Wever-Croes, MEP a manda dos carta na Eman sin ricibi reaccion, y pa e motibo ey fraccion a solicita un debate publico den Parlamento pa e organo legislativo por determina su posicion tocante e asunto.

“KEDA KETO NO TA ELIMINA E DUDANAN”

Wever-Croes ta considera cu Gobierno di Aruba tin un responsabilidad directo di representa e interes di pueblo Arubano den e asunto historico aki. “Gobierno di Aruba no por laga nos pueblo sin contesta riba e preguntanan serio aki. Ta su responsabilidad pa trata e asunto aki cu e seriedad cu e merece y pa insisti activamente serca di gobierno Hulandes pa haya aclaracion,” e lider di MEP a declara na Noticiacla. E ta adverti cu falta di reaccion por aumenta e desconfiansa en bes di elimina e preocupacionnan. “Keda keto no ta elimina e dudanan. Al contrario: e ta haci e situacion mas grave y ta aumenta e desconfiansa.”

E PREGUNTA TA KEDA HABRI

Cu e declaracion di Jetten, Gobierno Hulandes a laga sa cu e no kier interpreta e anotacionnan sin conoce nan contexto. Pero pa MEP, esaki no ta constitui un contesta na e preguntanan concreto cu partido a presenta. E diferencia ta cla: mientras Jetten ta pidi pa evita speculacion, Wever-Croes ta sostene cu un aclaracion oficial ta precisamente e manera pa evita cu speculacion sigui crece. E pregunta politico cu awor ta keda pendiente, ta si Gobierno di Mike Eman lo solicita e aclaracion di Den Haag formalmente y si Parlamento di Aruba lo trata e asunto den un debate publico. “Aruba tin derecho di haya claridad riba su propio historia. MEP lo sigui exigi contestanan,” Evelyn Wever-Croes a conclui.