Jetten: No specula riba notanan di Beatrix tocante Betico Croes

DEN HAAG — “Segun mi, ningun hende ta duda e gran dedicacion di Beatrix pa Caribe Hulandes, en particular pa Aruba.” Esaki ta loke Prome Minister Hulandes Rob Jetten a declara durante e debate riba e presupuesto di 2027 pa Rey, segun e portal dossierkoninkrijksrelaties.nl diaranson anochi. E declaracion a bin despues di un pregunta di miembro di Tweede Kamer Tijs van den Brink tocante e conmocion na Aruba riba notanan personal cu Beatrix a skirbi den añanan ochenta. Den e notanan ey, e tabata expresa su preocupacion tocante e lucha di politico Arubano Betico Croes pa Status Aparte.

E notanan a wordo publica e luna aki como parti di e investigacion tocante pasado colonial di Casa di Oranje. Lider di MEP, Evelyn Wever-Croes, a declara cu e revelacion a habri herida profundo den comunidad Arubano.

Van den Brink a bisa cu el a nota e inkietud durante un bishita di trabou na Aruba siman pasa cu e comision di Relacionnan den Reino. El a pidi Jetten pa duna mas contexto tocante e notanan. “Un elemento di e investigacionnan a causa inkietud na Aruba. E ta trata di e opinion di nos hefe di estado di e tempo ey cu un Status Aparte pa Aruba por tabata fatal, y su pregunta tocante e rol di Betico Croes, un heroe pa hopi hende riba e isla den e lucha pa Status Aparte,” Van den Brink a bisa. “Mi ta pensa cu lo ta bon si e prome minister por duna algun contexto awe tocante e declaracionnan aki. Esey por reduci e inquietud riba e isla bunita ey.”

JETTEN: CONTEXTO DI E NOTANAN NO TA CONOCI

Jetten a contesta cu, segun e, ta cla pa tur hende cu anterior Reina Beatrix, awor Princesa Beatrix, tabatin y ainda tin un cariño grandi pa tur e islanan di Reino, tanto prome, durante como despues di su reinado. El a señala cu e libretonan cu notanan personal a wordo uza pa e investigacion como un excepcion. “Mi no kier yega den un situacion den cual nos hunto ta interpreta con e notanan aki a surgi y kico tabata e intencion atras di nan, pasobra simplemente nos no conoce e contexto. Mi kier evita tur speculacion tocante esey,” Jetten a bisa. E prome minister a agrega cu el a papia tocante e asunto cu representantenan di Aruba, sin menciona nan nomber: “Mi a bisa esaki tambe den mi contactonan cu representantenan di Aruba.”