Helicopter di Wardacosta ta evacua turista cu atake di curason for di crucero

ORANJESTAD — Wardacosta di Caribe Hulandes a realisa un evacuacion medico urgente diamars anochi, 27 di oktober, pa rescata un turista Mericano di 79 aña cu a sufri un atake di curason abordo di un barco crucero.

Como cu e crucero tabata nabegando relativamente leu for di Aruba, a dicidi di manda un helicopter despues di consulta cu CITRO Medico, cu a confirma e urgencia di e situacion.

E helicopter a logra evacua e pasahero, hunto cu medico di e crucero, y transporta nan pa Aeropuerto Internacional di Aruba. Aya personal di ambulance a tuma e pashent over y transport'e pa hospital pa tratamento urgente.