Wever-Croes: “Hulanda si a menasa nos, pero no pa vacunacion”

ORANJESTAD — “Gobierno di Aruba a wordo poni bou hopi presion durante e temporada ey, diferente sorto di presion, pa diferente motibo.” Cu e declaracion aki, ex Prome Minister Evelyn Wever-Croes a confirma na Noticiacla cu durante pandemia di coronavirus, Gobierno di Aruba realmente a enfrenta presion di Hulanda. Sinembargo, e ta haci un distincion importante: e no ta reconoce un menasa pa stop ayudo financiero relaciona cu grado di vacunacion, pero si ta confirma un menasa tocante personal di salud cu Hulanda tabata subsidiando, si Aruba sigui cu su plan pa habri frontera.

PROME REACCION DI WEVER-CROES

Noticiacla a acerca Wever-Croes, kende tabata encarga cu Gobierno di Aruba durante e crisis di COVID-19, despues cu Gobierno Hulandes recientemente a rechasa e acusacion di director di Horacio Oduber Hospital, Jacco Vroegop, cu Hulanda a menasa di stop sosten financiero si Aruba no logra aumenta su grado di vacunacion.

VROEGOP A DENUNCIA PRESION DI HULANDA

Dia 5 di september 2026, Noticiacla a publica un relato di director di hospital Jacco Vroegop, kende a declara cu durante un reunion online den december 2021, e tempo ey secretario di estado Hulandes di Salud Publico Paul Blokhuis a adverti cu sosten financiero pa Aruba y Sint Maarten por wordo stop si e grado di vacunacion no aumenta. E declaracion a provoca preguntanan den Tweede Kamer di Hulanda, caminda parlamentario Pepijn van Houwelingen (FvD) a solicita aclareacion oficial di Gobierno Hulandes. Dia 27 di oktober, minister Hulandes Mirjam Sterk a rechasa e acusacion. Segun e minister, Gobierno Hulandes no ta reconoce e imagen presenta pa Vroegop y durante pandemia tabatin cooperacion constructivo cu Aruba, tanto cu autoridadnan como cu profesionalnan di salud. Hulanda tampoco a logra identifica exactamente cua reunion Vroegop tabata referi na dje. “NOS NUNCA A WORDO MENASA PA GRADO DI VACUNACION”

Den su reaccion directo na Noticiacla, Wever-Croes a confirma cu durante pandemia tabatin diferente forma di presion riba Gobierno di Aruba. “Algun logico y comprendible y otronan totalmente ilogico y incomprendible,” e ex prome minister a declara. Sinembargo, tocante e acusacion specifico di Vroegop, Wever-Croes ta categorico. “Pero pa loke ta e menasa den contexto di vacunacion, mi no ta conoci cu e menasa ey. Nos nunca a wordo menasa door di Hulanda cu lo stop e ayudo durante pandemia si no logra un cierto vaccinatie graad.” Segun Wever-Croes, ex minister Dangui Oduber tambe a confirma cu e no a ricibi un menasa di e naturaleza ey. “Dus ni ami ni Dangui a yega di wordo menasa pa esaki.” No obstante, e ex mandatario no ta exclui posibilidad cu Vroegop por a ricibi un mensahe diferente durante un reunion caminda Gobierno di Aruba no tabata representa. “Mi no ta na altura si loke ta wordo bisa door di sr. Vroegop lo a ser bisa durante un reunion entre hospital y Hulanda, caminda cu gobierno mes no tawata presente.” Wever-Croes si ta confirma cu Hulanda tabata considera un grado halto di vacunacion sumamente importante. “Nan a menasa nos ora nos a anuncia e exit strategy”. E revelacion mas significativo di Wever-Croes ta tocante un otro momento durante pandemia: e decision di Gobierno di Aruba pa cuminsa habri frontera como parti di su estrategia pa sali for di e crisis.

HABRI FRONTERA 

Segun e ex prome minister, Hulanda no tabata di acuerdo cu e plan di Aruba y a eherce presion directo riba Gobierno. “Loke si nan a menasa ta ora nos a anuncia e exit strategy. Nan no tabata kier pa nos habri frontera, y nan a menasa nos cu si e bai malo, nan lo trek terug e zorg personeel cu nan tabata subsidia pa nos.” Esaki ta un acusacion concreto di e ex mandatario: segun su relato, Hulanda a condiciona continuacion di sosten pa personal di cuido di salud na e consecuencia di e decision di Aruba pa habri frontera. Wever-Croes ta enfatisa cu, apesar di e advertencia, Gobierno di Aruba no a cambia su decision. “Pero nos tabata sigur di nos plan, dus nos a sigui cu e plan pa habri frontera.”

DOS MENASA DIFERENTE

E declaracion di Wever-Croes ta introduci un distincion importante den e controversia. Mientras Vroegop ta sostene cu Hulanda a menasa di stop ayudo financiero si e grado di vacunacion no aumenta, Wever-Croes ta bisa cu e no tin conocemento di un menasa asina dirigi na Gobierno di Aruba. Pero simultaneamente, e ta revela cu Gobierno si a ricibi un advertencia relaciona cu posibilidad di retira personal di salud subsidiado pa Hulanda, si habrimento di frontera resulta problematico. E dos relato no necesariamente ta contradici otro, mirando cu nan ta referi na circunstancianan diferente. Pero tampoco ta comproba e acusacion specifico di Vroegop.

PREGUNTANAN CU AINDA TA HABRI

Cu e reaccion di Wever-Croes, e debate tocante presion di Hulanda durante pandemia ta haya un dimension adicional. Mientras Gobierno Hulandes a rechasa e acusacion relaciona cu vacunacion, e declaracion di ex Prome Minister di Aruba ta lanta otro preguntanan: ken exactamente a comunica e advertencia tocante personal di salud, na ki momento esaki a sosode y si e menasa a wordo documenta oficialmente? Tambe ta keda pendiente pa determina si e reunion menciona pa Vroegop tabata un intercambio separa entre autoridadnan Hulandes y representantenan di hospital, sin participacion di Gobierno di Aruba.

E punto central di e reaccion di Wever-Croes ta cla: e no ta confirma e acusacion di menasa relaciona cu vacunacion, pero si ta afirma cu Hulanda a menasa Gobierno di Aruba den un otro asunto crucial durante pandemia. E declaracion ta pone un pregunta nobo riba mesa: te unda e cooperacion entre Hulanda y Aruba durante e crisis sanitario tabata acompaña pa presion politico y financiero, y unda e frontera tabata entre cooperacion y condicionamento di sosten?

E relato di Wever-Croes ta un testimonio directo di e persona cu tabata dirigi Gobierno di Aruba durante pandemia. E acusacion tocante retiro di personal di salud ainda ta pidi aclaracion di banda di Hulanda.