Studiantenan ta conoce oportunidadnan di carera den industria di timeshare

ORANJESTAD — Un grupo di studiantenan di enseñansa secundario profesional, entre 13 y 19 aña, a participa dia 29 di september na The World of Vacation Ownership, un programa organiza na La Cabana Beach Resort & Casino pa introduci hobennan na industria di timeshare na Aruba.

E programa ta enfoca riba studiantenan di hoteleria y enseñansa profesional y tin como meta mustra e variedad di carera den timeshare, stimula interes den enseñansa practico y laga hobennan mira tanto e balor cu nan por aporta como e oportunidadnan cu e sector por ofrece.

Durante e actividad, studiantenan a conoce diferente funcion den e industria, a traha den grupo riba retonan practico y a participa den un Vacation Ownership Challenge Lab, caminda nan a desaroya un concepto nobo pa restaurant Islander Grill.

Segun presidente di ATSA, Sulaika Kelly, timeshare ta un parti importante di turismo na Aruba y ta ofrece oportunidadnan den, entre otro, benta, marketing, operacion y maneho di resort.

E organizadonan ta spera pa sigui organisa e programa den añanan venidero, cu sosten di diferente socio y empresa local.