FlightHub: Aruba ta registra 118% aumento den reservacion for di Canada

ORANJESTAD — Aruba ta sobresali den e ultimo informe di FlightHub tocante tendencia di biahe pa 2026, cu un aumento di 118% den reservacionnan for di Canada compara cu e mesun periodo un aña prome.

E dato ta basa riba reservacionnan haci entre october 2025 y augustus 2026. Aruba ta entre e destinacionnan cu mas crecemento, despues di Casablanca, Marocco, cu a subi 250%, y Liberia, Costa Rica, cu 145%. Punta Cana tambe a registra un aumento fuerte di 109%.

E resultado ta indica cu Aruba ta gana mas interes entre biaheronan Canadiense den un aña caminda patronchinan di biahe a cambia significativamente. Segun FlightHub, eventonan internacional, preferencianan generacional y destinacionnan emergente ta influencia unda Canadiensenan ta biaha.

Mientras Delhi a bira e destinacion internacional mas popular entre Canadiensenan, sigui pa Tokyo, London, Cancún y Paris, e crecemento di Aruba ta pone e isla entre e destinacionnan cu mas aumento porcentual den demanda durante 2026.

FlightHub a basa su informe Unveiled riba comparacion di dato di reservacion cu e mesun periodo di 2025. E compania ta señala cu e tendencia lo mester wordo sigui pa mira si e aumento registra den 2026 lo continua den 2027.