DUO: Interes di studielening ta subi na 2027 y por afecta ex-studiantenan di Aruba

ORANJESTAD — Ex-studiantenan di Aruba cu tin un studielening of debe di estudio cu DUO por enfrenta un interes mas halto na 2027. Segun informacion oficial publica pa Dienst Uitvoering Onderwijs (DUO) dia 7 di october 2026, e porcentahenan nobo lo ta 2,70% pa e sistema di pago di 35 aña (SF35) y 3,28% pa e sistema di 15 aña (SF15).

Pa SF35, e interes ta subi for di 2,33% na 2026 pa 2,70% na 2027. Pa SF15, e aumento ta mas grandi: for di 2,29% pa 3,28%. Segun DUO, casi tur studiante actual ta cay bou di e regla di 35 aña, mientras un grupo mucho mas chikito ta cay bou di e sistema di 15 aña.

E aumento no ta aplica automaticamente na tur ex-studiante cu tin debe. Pa personanan cu ta pagando nan studielening caba, e interes normalmente ta keda fiho pa cinco aña. E tarifa di 2027 lo aplica na esnan cu nan periodo actual di interes ta termina dia 31 di december 2026, como tambe na studiantenan cu a ricibi studiefinanciering pa ultimo biaha den 2026.

DUO ta indica cu mas di 250.000 ex-studiante lo haya e porcentahe nobo na 2027 pasobra nan periodo di interes fiho ta termina. Segun DUO, e interes riba studiefinanciering ta conecta cu e interes cu Gobierno Hulandes mester paga riba su propio prestamonan.

Pa ex-studiantenan di Aruba cu a studia na Hulanda cu financiamiento di DUO, e efecto exacto lo depende di e sistema di pago cu ta aplica, e tamaño di nan debe y momento cu nan periodo di interes actual ta termina.