Censo ta cambia proceso di inscripcion pa reduci atraso

Censo ta cambia proceso di inscripcion pa reduci atraso

Posted on 11/20/2026, 5:38 PM AST | Updated on 11/20/2026, 5:39 PM AST

ORANJESTAD — Censo lo introduci un proceso nobo pa inscripcion y reinscripcion den Registro di Poblacion entrante dialuna 23 di november 2026, pa 8’or di mainta. E medida ta busca reduci atraso, evita mal uso y benta di cita, y mehora control di documento. E cantidad di inscripcion a subi di un promedio di 2.900 pa aña pa mas cu 5.300 e aña aki, un aumento di mas cu 82%. Segun informacion di DIMAS, ainda tin 5.470 persona cu permiso cu no a wordo inscribi. Citanan cu a wordo fiha caba lo keda vigente.

LOKET DIGITAL SIN NECESIDAD DI CITA

E loket digital lo ta disponibel, sin necesidad di cita, pa:

- Ciudadanonan hulandes naci den Reino Hulandes of Surinam.

- Ciudadanonan di un pais miembro di Union Europeo, naci den Union Europeo.

- Personanan naci na Aruba, independientemente di nacionalidad.

- Personanan cu ta reinscribi dentro di cinco aña.

PERSONANAN CU SI MESTER DI CITA

Tur otro persona mester manda nan documentonan via email pa un evaluacion preliminar, prome cu Censo duna nan un cita:

- Fam A–M: AfsprakenA-M@censo.aw

- Fam N–Z: AfsprakenN-Z@censo.aw

Mester manda scan di e documentonan original den formato PDF e inclui un number di telefon. Si e documentonan ta completo y inicialmente considera suficientemente confiabel, Censo lo manda un cita cu fecha, ora y un codigo unico pa presenta na Schoolstraat 2. E requisitonan pa cada categoria ta riba www.censo.aw/main/inschrijving/. Pa otro pregunta, por manda un email na info@censo.aw.