Iberostar ta gana su caso: Corte ta ordena decision nobo riba permiso di naturalesa

ORANJESTAD — Corte di Prome Instancia na Aruba a duna Ibersol Holding & Management VBA, e compania relaciona cu proyecto di Iberostar na Hudishibana, razon den su apelacion contra rechazo di e exoneracion necesario bou di Natuurbeschermingsverordening. Corte a anula e decisionnan anterior y a ordena e minister competente pa tuma un decision nobo dentro di tres luna.     

MINISTER LEGAL COMPETENTE 

Un punto central den e fayo ta cu e decision anterior no a wordo tuma door di e minister legalmente competente. Corte a conclui cu e cambionan den Landsbegroting 2026 no a transferi  e responsabilidad pa proteccion di naturalesa automaticamente. Segun e marco legal vigente, e minister encarga cu Transport, Integriteit, Natuur en Ouderenzaken ta esun cu mester dicidi riba e peticion.      

CONTENIDO DI E RECHAZO

Corte a critica tambe e contenido di e rechazo. Gobierno a inclui argumentonan amplio tocante turismo, economia, impacto social, paisaje y archeologia, mientras e Natuurbeschermingsverordening ta enfoca specificamente riba proteccion di planta y animal individual di especie protegi. E interesnan mas amplio por ta relevante den otro procedimiento, pero no por sirbi automaticamente como base pa rechaza e exoneracion aki.      

MINITER MESTER INVESTIGA MAS CONCRETAMENTE

DNM a registra 15 especie di planta y 12 especie di animal den e area, di cual ocho ta protegi. Corte a ordena pa e minister investiga concretamente cual especie protegi por wordo afecta, nan importancia pa supervivencia di e especie y e posible impacto riba otro flora y fauna. Tambe mester wordo pidi conseho di e autoridad cientifico competente.      

ENVIRONMENTAL MANAGEMENT PLAN 

E minister mester considera tambe e Environmental Management Plan di Ibersol, incluyendo posibilidad pa move flora y fauna protegi y pa impone condicionnan cu limita daño. Segun Corte, e plan aki no a wordo inclui debidamente den e evaluacion anterior.      

E fayo no ta significa cu Iberostar a haya permiso final pa construccion. E proyecto tin  un bouwvergunning y aanlegvergunning caba, pero e exoneracion di naturalesa ainda mester wordo reconsidera.      

GASTONAN

Gobierno di Aruba mester paga Afl. 1.400 den costo procesal y restitui Afl. 25 di griffierecht pa cada caso concerni. Tin posibilidad di apela e fayo dentro di seis siman. Lesa e sentencia AKI.