KvK: Turismo nobo mester ataca sobreturismo y problemanan actual prome

ORANJESTAD — Camara di Comercio y Industria Aruba (KvK) ta bisa cu un maneho nobo di turismo mester cuminsa prome cu solucion pa e problemanan actual cu Aruba ta enfrenta, en bes di enfoca riba mas crecemiento di turista. Den su analisis di e Plan di Implementacion Strategico di Turismo 2026–2031, KvK ta reconoce cu e plan a mehora compara cu versionnan anterior, pero ta sigui cu preocupacionnan serio tocante direccion y factibilidad.

SOBRETURISMO, FALTA DI PARKEER, NIVEL DI SERVICIO

Segun KvK, sobreturismo ta un realidad diario, visibel den playanan yen, falta di parkeer, congestion den centro di Oranjestad, infrastructura sobrecarga y mas kehonan tocante nivel di servicio. Tambe KvK ta bisa cu e propuesta pa move crucero pa San Nicolas no ta realisabel a corto plazo, pasobra e area pa e area pa mara e barco crucero” ta contamina y e costo pa sanea esaki, no ta inclui den e plan.

VACATION RENTALS

Un otro punto di preocupacion ta cu sector di vacation rentals, manera Airbnb, ainda no ta regula. KvK ta señala cu Aruba tin alrededor di 4.100 unidadnan activo, cu ta aumenta presion riba prijs di cas, material di construccion y costo di bida, mientras hopi famia local cada biaha ta haya mas dificil pa cumpra un cas.

CAPACIDAD DI CARGA

KvK ta argumenta cu Aruba a surpasa su capacidad di carga y cu e isla mester move di un modelo basa riba volumen pa uno enfoca riba balor. Segun e organisacion, un reduccion gradual den cantidad di turista y un enfoque riba bishitantenan cu ta gasta mas lo ta mehor pa economia, medio ambiente y calidad di bida. KvK ta agrega cu datonan di Banco Central ta mustra cu cada 1% crecimiento den turista a produci solamente 1,16% crecimiento real den entrada di turismo, bou di e metanan menciona den e plan.

SEIS ORGANO NOBO 

KvK ta critica tambe e propuesta pa crea mas di seis organo nobo pa ehecuta e plan, pasobra esaki por aumenta burocracia y haci coordinacion mas dificil. Ademas, e organisacion ta cuestiona e diferente fee nobo pa turista, manera entry fee, natural capital contribution y otro cargo adicional, pasobra Aruba caba tin fama di destino caro, mientras e nivel di servicio ta bou di presion.

CONCLUSION: SOLUCIONA PROBLEMANAN ACTUAL PROME

Pa KvK, e conclusion ta cla: Aruba mester soluciona e problema actualnan, regula sectornan cu ainda no tin control, baha presion riba infrastructura y mehora calidad di servicio, prome cu pensa den mas crecemento turistico.