Bermudez (AVP) kier revision di multanan DIMP pa pagonan toch haci na tempo

ORANJESTAD — Parlamentario di AVP, ing. Carlos Bermudez, a dirigi preguntanan oficial na minister Geoffrey Wever tocante multanan di impuesto di vehiculo cu posiblemente a wordo imponi na ciudadano cu en realidad a paga na tempo.

Segun Bermudez, tin caso caminda ciudadano a paga riba e ultimo dia oficial, 2 di februari 2026, y tambe a entrega comprobante bancario y peticion pa recibo, pero toch a ricibi multa pasobra den e sistema di DIMP e pago a aparece como si tabata registra demasiado laat.

Bermudez ta cuestiona si ciudadano mester carga cu e consecuencianan di tardansa bancario of administrativo. Segun e, si gobierno a fiha un fecha final y ciudadano por comproba cu e pago a wordo haci riba e fecha ey, e ciudadano no mester wordo castiga.

E parlamentario ta pidi pa investiga cuantu persona durante 2026 a ricibi multanan similar, comparando datonan di DIMP, peticionnan via Decos Join y comprobantenan bancario. Si e revision mustra cu tin multanan a wordo imponi inhustamente, Bermudez ta pidi pa eliminanan y considera restitucion of compensacion den casonan caminda e multa a wordo paga caba.

Tambe e ta pidi pa revisa of adapta e sistema di control di DIMP pa evita cu situacionnan similar sigui repiti. Su posicion ta cla: si un ciudadano paga laat, e ta paga multa; pero si el a paga na tempo, e no por paga pa limitacionnan tecnico of administrativo di gobierno.