Partidonan AVP y UPB kier mas cooperacion Aruba-Boneiro den Reino

KRALENDIJK — AVP y Union Patriotiko Boneriano (UPB) ta sigui fortifica nan relacion historico, cu enfasis riba cooperacion mas estrecho entre Aruba y Boneiro y un rol mas activo pa ambos isla den Reino Hulandes.

Despues di participacion di UPB na Congreso di AVP na Aruba, Prome Minister y ex-lider di AVP Mike Eman a bishita sede di UPB na Boneiro. E al reuni cu lider interino Jolinda Craane, ex-lider James Kroon y Burney El Hage pa papia tocante futuro di Reino, relacion entre e islanan y oportunidadnan pa cooperacion concreto.

Ambos partido ta destaca nan raiznan cristian-democrata y e principio di bon comun. Eman a enfatisa cu crecemento economico mester traduci den mihor calidad di bida, no solamente den un sector turistico fuerte, sino tambe den mihor bario, salud y infrastructura.

AVP ta mira intercambio di conocemento y experiencia como un manera pa fortalece posicion di Aruba y Boneiro. Cu Wendrick Cicilia como lider nobo di AVP, e partido ta indica cu kier sigui profundisa e relacion cu UPB y transforma e amistad historico den mas cooperacion practico.