Trahadonan di Arubus ta escala accion despues di paro di mainta

ORANJESTAD — Trahadonan di Arubus a dicidi di escala nan accion laboral pa diahuebs awor, algun ora despues di e paro di trabou cu a afecta transporte publico dialuna mainta. Secretario general di SEPPA, Magaly Brito, a confirma e decision na Tito Laclé di Noticiacla, indicando cu falta di reaccion di parti di gerencia y Gobierno a conduci na e siguiente paso. “Ya nan a tuma decision pa escala e accion,” Brito a confirma. Segun e, te despues di e prome accion no a bin e reaccion cu trahadonan tabata spera for di gerencia di Arubus ni di e ministerio responsabel pa transporte publico.

E conflicto ta relaciona cu e lucha di trahadonan pa un CAO nobo, incluyendo un structura salarial y condicionnan laboral cu, segun SEPPA, a keda pendiente durante añanan. Brito a indica cu trabahadonan ta cansa di scuchamento repetitivo cu no tin fondo of cu situacion financiero di compania no ta permiti un acuerdo.

Segun e lider sindical, e meta no ta simplemente paralisa transporte publico, sino logra cu partidonan bolbe na mesa di negociacion “di un manera hustu y sincero” pa yega na un acuerdo cu ta ofrece mas siguransa pa trabahadonan.

SEPPA a laga e posibilidad c abri u e accion por wordo reevalua si durante dia bin un reaccion positivo. “Si e reaccion ta positivo, naturalmente nos por evalua y cambia of para un accion cu a wordo dicidi. Semper esaki ta pasa den consulta cu e trahadonan,” Brito a splica.

Detayenan exacto tocante duracion y momento di e accion escala lo wordo determina y comunica. Lo ta cla, sinembargo, cu si no tin un cambio di rumbo, transporte publico por wordo afecta atrobe y pa un periodo mas largo.