Tour Operators Uni y DNM ta inspecciona Tera Cora; ainda no tin decision riba ruta

ORANJESTAD — Representantenan di Tour Operators Uni a bishita e area di Tera Cora hunto cu Minister di Infrastructura Rene Herdé y director di Directie Natuur en Milieu (DNM), Gisbert Boekhoudt, pa haya mas informacion riba zonanan fragil, neishinan di shoco y otro aspectonan ambiental. E bishita tabata solamente un orientacion; no tabata un negociacion y no a wordo tuma ningun decision tocante e ruta di UTV, ATV y Jeep.     

Durante e bishita, e grupo a constata un neishi di shoco den un area cu DNM a identifica anteriormente. Segun midimento basa riba registro GPS di e bishita, e neishi ta situa aproximadamente 375 meter for di e caminda di santo unda e vehiculonan ta pasa, y aproximadamente 30 meter for di e heki di e veld di golf. Tour Operators Uni ta spera cu DNM lo comparti su documentacion y mapa di neishinan cu tur parti involucra.     Tour Operators Field Trip 2026

E organisacion a califica e bishita como un paso positivo y a bisa cu e informacion riba zonanan fragil, reproduccion, flora y fauna ta importante pa e dialogo. Tour Operators Uni a pidi tambe pa Aruba Birdlife Conservation participa den un futuro bishita y reunion. Segun e grupo, Birdlife no a participa den e bishita ni den reunionnan cu operadornan durante september.     

Tour Operators Uni a manda un carta na Prome Minister y Minister di Infrastructura pa pidi cu un reunion cu Aruba Birdlife Conservation wordo facilita lo mas pronto posibel, cu meta di inclui tur parti den e conversacion tocante futuro di turismo y proteccion di naturalesa.