Trahadonan di Fundacion Facilidadnan Deportivo a pone trabou abou pa motibo di CAO

ORANJESTAD — Trahadonan di Fundacion Facilidadnan Deportivo (FFD) a tene un accion di protesta dialuna mainta, e di dos accion laboral cu Aruba ta experencia riba e mesun dialuna. Secretario general di sindicato SEPPA, Magaly Brito, a splica na Tito Laclé di NoticiaCla cu e malcontento ta relaciona principalmente cu falta di progreso pa cuminsa negociacionnan riba un CAO nobo.

Segun Brito, e CAO actual a vence desde principio di aña y sindicato a sigui pidi pa cuminsa preparacion y negociacion pa un acuerdo nobo. Sin embargo, segun dje, FFD a sigui promete un fecha sin cu esaki a materialisa. “Cada biaha nan ta bisa nos cu sí, pronto, pero tempo ta pasando y no tin nada.”

INTENTO PA REUNION 

SEPPA a indica cu despues di diferente intento pa logra un reunion, sindicato finalmente a duna FFD un ultimatum pa fija un fecha concreto. Brito a bisa cu no tabatin reaccion di bestuur, ni un fecha pa cuminsa negociacionnan. Como resultado, trahadonan a dicidi inicia un accion di protesta. E accion di dialuna mainta tabata di dos ora, pero Brito a adverti cu si no tin reaccion, accionnan lo wordo escala. “Awe e accion aki lo ta di dos ora y despues di esaki, si no tin reaccion, e accion lo escala.”

TRABOU DI FFD

FFD ta responsabel pa maneho y mantenemento di diferente complehonan deportivo na Aruba, entre nan Frans Figaro, Santa Cruz, Yara y Pos Chiquito. Trahadonan ta encarga cu mantenemento, coordinacion y contacto cu diferente organisacionnan deportivo. Segun Brito, si e conflicto no wordo resolve, accionnan futuro por afecta directamente actividadnan deportivo cu ta depende di e facilidadnan aki. “Si no tin un contesta positivo, e siguiente accionnan por afecta maneho di deporte.”

Brito a indica cu ta trata di mas o menos 20 y algo trahador bou di e fundacion. SEPPA lo reuni atrobe cu nan pa determina e siguiente paso y lo duna FFD un periodo relativamente cortico pa reacciona y fija un fecha pa cuminsa negociacionnan.