Hospital lo papia e siman aki ainda; sino, ta bay corte!

ORANJESTAD — E conflicto financiero entre Horacio Oduber Hospital (HOH) y Gobierno di Aruba ainda no tin solucion. Director di hospital Jacco Vroegop a confirma na Noticiacla cu HOH lo intenta papia un biaha mas e siman aki cu gobierno. Si esaki tampoco conduci na un solucion, hospital ta prepara pa bay corte den un kort geding.

“Nos lo papia un biaha mas. E carta pa esaki lo sali e siman aki. Y den e carta nos lo inclui cu si esaki no conduci na un solucion, e siguiente paso no por ta otro sino un kort geding,” Vroegop a declara na Noticiacla.

E problema ta relaciona principalmente cu mas cu Afl. 28 miyon na gasto di cuido medico cu HOH ta carga y cu ainda no a haya un solucion structural. E situacion financiero ta pone presion creciente riba hospital, mientras costonan operacional ta sigui subi.

Noticiacla a reporta anteriormente cu Vroegop a adverti cu, si no bin suficiente financiamento, e consecuencia eventualmente por ta cu HOH mester reduce of hasta para cu cuido regular planificabel.

Hospital ta duna espacio awor pa un ultimo intento di negociacion. Pero Vroegop su mensahe ta cla: si e conversacion di e siman aki no produci un solucion, HOH ta bay corte.