Shoco no por haya un break: auto ta kibra muraya cu pintura di shoco na Westpunt

ORANJESTAD — E shoco na Aruba literalmente parce di no por haya ‘un break’. Mientras e especie ya ta den centro di preocupacion tocante proteccion di su habitat, awor hasta un muraya cu un bunita pintura di shoco ariba, a bira victima durante fin di siman.

Na altura di restaurant El Faro Blanco na Westpunt, un auto cu plachi T a dal contra e muraya y a causa daño considerable. Riba e muraya tabatin un pintura grandi y atractivo di un shoco, cu tabata hala hopi atencion di bishitantenan y turista.

No ta conoci ainda kico exactamente a causa cu e auto a termina contra e muraya. Segun informacion na sitio, tabatin basta turista presente cu a mira e incidente sosode.

E caso tin un cierto ironia, pasobra e shoco mes ta un especie cu regularmente ta aparece den discusionnan tocante proteccion di naturalesa na Aruba, particularmente rond zonanan di neishi y presion riba su habitat.

Awor, por bisa cu hasta su representacion artistico no a scapa: e muraya cu tabata honra e shoco a keda kibra door di un auto.