Transporte publico a lanta practicamente plat na Aruba

ORANJESTAD — Transporte publico na Aruba a keda practicamente plat como resultado di accion laboral di empleadonan di Arubus, segun secretario general di sindicato SEPPA, Magaly Brito, den un entrevista cu Tito Laclé di Noticiacla dialuna mainta tempran.

CAO NOBO

Segun Brito, e conflicto ta centra principalmente rond di negociacion pa un CAO nobo y mas husto, incluyendo structura salarial y otro condicionnan laboral cu, segun e sindicato, a keda atras durante añanan. E ta indica cu trabou di e empleadonan ta bira cada biaha mas pisa, mientras e CAO actual a sigui wordo prolonga sin cu un solucion definitivo a yega. Brito a splica cu na principio di e aña SEPPA a sinta na mesa cu gerencia di Arubus y cu a yega na cierto entendemento tocante diferente articulonan. Sinembargo, segun e, e problema principal ta e falta di fondo.

A PIDI FONDO PERO NO TIN REACCION

“Nos a presenta nos mes cerca Gobierno di Aruba pa pidi e fondonan necesario pa por yega na un acuerdo. Te awe nos no a haya ningun reaccion. Ningun reaccion absolutamente.” Segun SEPPA, Arubus tambe tin compromiso financiero grandi, incluyendo deuda cu Departamento di Impuesto, loke ta complica espacio pa yega na un acuerdo salarial sin apoyo financiero di Gobierno di Aruba, e unico accionista di e compania.

ACTITUD PASIVO

Brito tambe critica loke e considera un actitud demasiado pasivo tanto di Gobierno como di gerencia di Arubus. Segun e, gerencia no ta eherciendo suficiente presion pa haya e fondonan necesario. Aunke cierto empleado cu ta traha bou di otro tipo di contrato ainda ta mantene algun servicio, Brito a confirma cu e impacto ta amplio. “Transporte publico ta para awor aki, basicamente.” Brito a bisa. 

TRANSPORTE ESCOLAR AFECTA 

E accion tambe ta afecta transporte escolar. Brito a reconoce e inconveniencia pa publico, pero a enfatisa cu trabou ta protesta pa logra un CAO y otro derechonan laboral cu nan ta reclama desde tempo.   SEPPA no a descarta escalacion. Si no bin reaccion of solucion, comision di accion lo reuni atrobe cu empleadonan pa determina e siguiente paso.