Aruba ta amplia negoshi internacional di aviacion cu acuerdo cu San Marino

ORANJESTAD — Aruba ta sigui fortalece su posicion como jurisdiccion internacional pa aviacion cu un acuerdo nobo cu San Marino. E acuerdo, firma dia 7 di september, ta permiti cu avion registra na San Marino por opera comercialmente bou di un Air Operator Certificate (AOC) di Aruba. Desde mei, e construccion contrario ya tabata posibel: avion cu registracion Arubano P4 por opera bou di un AOC di San Marino.

E modelo ta separa dos cos importante: registracion di e avion y permiso pa operacion comercial. Esaki ta permiti cu un avion por ta registra den un jurisdiccion y opera bou supervision di otro autoridad di aviacion.

Pa Aruba, esaki ta sigui un modelo cu e pais ta desaroya pa añanan. Un compania cu tin su sede principal na Aruba por solicita un AOC cerca di Directie Luchtvaart, pero esaki no ta nifica cu e avion necesariamente mester opera for di Reina Beatrix Airport of hasta bin Aruba regularmente.

E sistema ta principalmente atractivo pa aviacion internacional, specialmente pa companianan, doñonan, lessors y operators cu kier usa Aruba como base juridico y regulatorio, mientras e avionnan ta wordo usa den otro parti di mundo.

E acuerdo cu San Marino ta funciona bou di articulo 83 bis di Convenio di Chicago, cu ta permiti diferente paisnan parti responsabilidadnan di supervision. Cada autoridad ta keda responsabel pa su propio parti.

Un aspecto notable ta cu e registronan di Aruba y San Marino ta wordo apoya comercialmente pa e mesun grupo priva, Aviation Registry Group, basa na Miami. E compania ta opera The Registry of Aruba desde 1995 y tambe e registro di San Marino desde 2012.

E actividad aki tin valor economico pa Aruba. Den presupuesto di 2026, Directie Luchtvaart tin un estimacion di Afl. 1,3 miyon anual pa servicio relaciona cu coordinacion di registracion di avionnan extranjero. E cifra no ta inclui ingreso di e socio priva ni otro actividad economico relaciona cu servicio legal, financiero y aviacion.

E acuerdo ta mustra cu sector di aviacion di Aruba no ta limita na vuelo di pasahero pa y for di e isla. Aruba ta bende registracion tambe certificacion, regulacion y supervision como servicio internacional, incluso pa avionnan cu posiblemente casi nunca ta opera fisicamente na Aruba.