Wever-Croes(MEP): Parlamento fuerte ta esencial pa proteha democracia

ORANJESTAD — Evelyn Wever-Croes a marca Dia Internacional di Democracia, celebra cada 15 di september, cu un mensahe enfoca riba importancia di un Parlamento fuerte, control riba Gobierno y respeto pa e bos di pueblo. Nacionan Uni  reconoce 15 di september oficialmente como Dia Internacional di Democracia.

Segun Wever-Croes, democracia no ta limita na vota cada cuater aña, sino ta inclui respeto pa oposicion, estado di derecho, transparencia y e derecho di Parlamento pa cuestiona y controla Gobierno.

Den su declaracion, el a expresa preocupacion tocante situacionnan unda preguntanan parlamentario no ta wordo contesta, reunionnan publico no ta wordo yama of oposicion no ta haya suficiente espacio pa cumpli cu su funcion. Segun e, esaki no ta debilita solamente Parlamento, sino democracia mes.

Wever-Croes a enfatisa cu poder mester tin contrapeso, Gobierno mester rindi cuenta y diferente opinion mester por existi libremente.

“Un Parlamento fuerte ta haci Aruba mas fuerte,” e la conclui.