Arends-Reyes (AVP) ta pidi plan multianual pa scolnan sigur y digno

ORANJESTAD — Lider di Fraccion di AVP, Jennifer Arends-Reyes, ta pidi Gobierno pa presenta un plan multianual transparente pa atende e atraso grandi den mantencion di scolnan di Aruba y garantiza edificionan sigur y digno pa alumno y maestro.

Segun un inventario publica, 43 scol den diferente districto tin necesidadnan urgente. Arends-Reyes ta señala cu tin diferencia den e cifranan menciona: subtotalnan di cinco districto ta yega aproximadamente Afl. 173,6 miyon, mientras documento ta indica un total di Afl. 137,6 miyon, sin inclui scolnan di Oranjestad y scolnan secundario. P’esey, e ta pidi Gobierno pa aclara e costo real y establece prioridadnan transparente.

Segun e parlamentario, falta di mantencion preventivo durante añanan a permiti cu problemanan chikito bira daño mas serio na dak, muraya, instalacion electrico, baño y ventilacion. E ta argumenta cu condicion di e edificionan ta toca directamente siguridad, salud, continuidad di les y calidad di enseñansa.

Arends-Reyes ta propone un inventario completo di cada scol, incluyendo condicion actual, trabou necesario, costo estima, urgencia y ken ta responsabel pa ehecucion. Scolnan cu riesgo directo pa salud of siguridad mester haya prioridad.

Como e atraso no por wordo elimina den un solo aña presupuestario, e ta propone un programa multianual. Alabes, prome cu haci inversionnan grandi, Gobierno mester analiza cantidad actual y futuro di alumno, capacidad di edificionan y necesidadnan di cada districto.

E parlamentario no ta exclui fusion di scolnan como opcion pa futuro, pero ta enfatisa cu un decision asina no por basa solamente riba placa. Distancia, transporte, calidad di enseñansa, identidad di scol y impacto riba alumno, maestro, mayornan y comunidad mester wordo considera.

Finalmente, Arends-Reyes ta propone inspeccion periodico, presupuesto anual pa mantencion y responsabilidad cla pa evita cu scolnan renoba bolbe deteriora. Segun e, un scol sigur y digno “no ta un luho”, sino un condicion basico pa bon enseñansa.