Aruba a bira 17% mas barata pa turistanan Colombiano

ORANJESTAD — Aruba ta aparece entre e destinacionnan cu a bira notablemente mas barata pa turistanan for di Colombia, segun un analisis publica pa El Colombiano basa riba data di KAYAK. E prijs promedio di buelo ida y buelta pa Oranjestad a baha 17% compara cu e mesun periodo di 2025, y a yega na aproximadamente 1.222.621 peso Colombiano.

Cu esaki, Aruba ta entre e destinacionnan cu e reduccion mas grandi den tarifa aereo. E bahada di 17% ta mas fuerte cu e reduccion registra pa Miami, cu 8%, y Willemstad, Corsou, cu 7%.

Den un comparacion di e destinacionnan cu buelo mas barata for di Colombia, Oranjestad ta ocupa e di cuatro posicion. Ciudad di Panama ta prome cu un tarifa promedio di 923.941 peso Colombiano, sigui pa Ciudad di Guatemala y Santo Domingo. Aruba ta sigui despues cu 1.222.621 peso Colombiano pa un vuelo ida y vuelta den economy class.

E  scenario ta wordo haci mas favorable pa turistanan Colombiano door di fortaleza reciente di peso Colombiano contra dollar. Cu dollar rond di 3.100 peso, e turistanan tin mas poder di compra pa gastonan cu ta paga den dollar, incluyendo hotel, cuminda, transporte, compras y actividadnan turistico.

Pa Aruba, un destinacion unda hopi gasto turistico ta directa- of indirectamente liga na dollar, e combinacion di buelo mas barata y un peso Colombiano mas fuerte por haci e isla mas atractivo pa mercado Colombiano.

Sinembargo, e analisis ta enfatisa cu un dollar mas barata no automaticamente ta nifica cu tur parti di e biahe ta mas barata. Precio di hotel, demanda, temporada, disponibilidad di asiento y momento di reservacion tambe ta determina costo final.