DNM ta destaca impacto di Kigali pa un Aruba mas fresco

ORANJESTAD — Den cuadro di Dia Internacional pa Preservacion di e Capa di Ozon 2026, Directie Natuur en Milieu (DNM) ta pone enfasis riba importancia di e Protocol di Montreal y, especialmente, e amienda di Kigali, cu ta cumpli 10 aña.

E amienda, adopta na 2016, tin como meta reduci produccion y consumo di hidrofluorocarbononan (HFC), gasnan cu no ta daña directamente capa di ozon, pero cu tin un efecto fuerte riba keintamento global.

Segun DNM, reduccion gradual di HFC por yuda evita te cu 0,5 grado Celsius di aumento adicional den temperatura global pa fin di e siglo. E acuerdo tambe a impulsa desaroyo di sistemanan di refrigeracion mas eficiente y mas sostenibel.

Pa Aruba, cu su clima semi-arido tropical y vulnerabilidad pa cambio climatico, e tema tin un importancia practico. DNM ta apunta riba aumento di temperatura, subimento di nivel di lama y presion riba ecosistemanan marino manera coral.

E transicion pa cu airco y sistemanan di friamento cu ta usa menos energia por yuda baha consumo di electricidad y combustibel fossiel. Alabes, regulacion di gasnan di refrigeracion mester contribui na uso di alternativanan mas sostenibel den industria local.

DNM ta liga e esfuerso global tambe cu accion local. Planta matanan y palonan den cura y espacio bashi por duna mas sombra, baha temperatura local, absorbe carbono y proteha biodiversidad. E meta di planta 100.000 mata rond di Aruba ta wordo menciona como un ehempel di accion concreto.

Segun DNM, proteccion di atmosfera no ta responsabilidad di paisnan grandi so, sino un esfuerzo conhunto cu tambe ta beneficia Aruba directamente.