Ben Saunders, prome ganador di The Voice of Holland, a fayese cu 43 aña

ARNHEM — Cantante Ben Saunders, conoci como e prome ganador di The Voice of Holland, a fayese na edad di 43 aña. Su famia a confirma su morto despues cu ayera a haya curpa di un homber cerca di un lago recreativo zuid di Arnhem.

Causa di su morto no a wordo publica. Polis a indica anteriormente cu no tin indicacion di un delito.

Su ruman Dean Saunders a reacciona emocionalmente riba Instagram, describiendo Ben como su “ruman chikito stima” y pidiendo publico pa trata e perdida cu respeto, especialmente pa su famia y yiunan.

Ben Saunders, naci na London, a bira conoci nacionalmente na 2011 ora el a participa den e prome temporada di The Voice of Holland. Durante su blind audition, su interpretacion di Use Somebody di Kings of Leon a convence tres coach casi inmediatamente. Finalmente el a gana e competencia y haya un contrato discografico.

Su hit mas grandi tabata Kill For A Broken Heart. El a publica dos album: You Thought You Knew Me by Now na 2011 y Heart & Soul na 2012.

Despues cu su exito musical a disminui, Saunders a aparece diferente biaha den noticia relaciona cu asunto hudicial. Na 2015 el a wordo condena na 180 ora di trabou comunitario pa maltrato di un verkeersregelaar y tambe mester a paga compensacion. El a keda relaciona tambe cu motorclub Satudarah, cu despues a wordo prohibi.

Na 2023 Saunders a participa ainda den programa Avastars. Ultimamente el a muda pa Arnhem, unda anteriormente el a habri un tattooshop y a bisa cu e trankilidad y ambiente amistoso di e ciudad a hacie sinti na cas.