AHATA ta boga pa menos bishitante, mas balor pa turismo di Aruba

ORANJESTAD – AHATA a organisa un sesion exclusivo titulá “How to Fix Tourism”, enfoca riba e necesidad di recalibra turismo di Aruba y busca un modelo cu ta genera mas balor economico cu menos presion riba isla y calidad di bida di su habitantenan.

E orador principal, experto internacional di turismo Doug Lansky, a presenta recomendacionnan basa riba experiencia di diferente destinacion. Su mensahe central tabata cu Aruba por sigui aumenta entrada turistico sin necesariamente aumenta e cantidad total di bishitante.

Segun Lansky, un strategia nobo mester enfoca riba atrae bishitantenan cu ta contribui mas na economia y bienestar di Aruba, mientras ta limita e impacto negativo di demasiado hende riba isla na mesun momento.

Entre e medidanan cu el a menciona como posible paso inicial ta limita propiedad stranhero di Short-Term Vacation Rentals y pone un limite riba e cantidad di pasahero di crucero cu por yega Aruba riba mesun dia.

Minister di Turismo, Transporte y Labor, Wendrick Cicilia, a presenta su vision pa un Plan di Implementacion cu mester recalibra turismo. Su enfoke ta pone mas enfasis riba crecemento den balor en bes di cantidad, mientras calidad di bida di ciudadano ta bira un elemento central den maneho turistico.

Miembronan di AHATA a participa den un sesion di pregunta y contesta cu Lansky y Minister Cicilia. Tambe tabatin presencia di Parlamentario Jennifer Arends-Reyes y CMO di ATA, Sanju Luidens-Daryanani.

AHATA, cu representa alrededor di 160 miembro den y rond industria turistico, ta sostene cu futuro di turismo di Aruba mester combina exito economico cu bienestar socio-economico di comunidad.