Vrolijk (MEP) ta exigi claridad riba costo y pago di jet priva usa pa biahe oficial di Minister Croes

ORANJESTAD – Parlamentario Edgard Vrolijk ta cuestiona e splicacionnan duna tocante e biahe cu jet priva di Minister Gerlien Croes pa Corsou na november 2025 y ta sostene cu, como tabata trata di un dienstreis oficial, Parlamento tin derecho di exigi transparencia completo.

Vrolijk ta referi na un e-mail di 19 di november 2025 di Chief of Staff di e ministerio, cu segun e ta confirma cu e minister a adelanta su biahe oficial pa Corsou cu un dia. E biahe inicialmente tabata planea pa 20 te 22 di november, pero Croes a sali 19 di november.

Segun Vrolijk, esaki ta importante pasobra e ta demostra cu no tabata trata simplemente di un biahe priva, sino di un biahe oficial. E parlamentario ta argumenta cu e splicacionnan publico tocante con e vuelo a wordo paga a varia: desde un “lift”, te na paga e vuelo personalmente, comparti gasto y, mas recientemente, paga un landing fee di menos cu Afl. 1.000.

Vrolijk ta bisa cu un landing fee no ta representa costo total di un jet priva y ta puntra ken a cubri otro gastonan manera combustibel, crew, handling y operacion.

E parlamentario ta indica tambe cu articulo III.17 di Staatsregeling ta duna Parlamentario derecho di haci pregunta na minister, y ta rechasa e idea cu e asunto ta trata di bida priva. Segun dje, Parlamento ta controla un biahe oficial confirma pa e propio ministerio.

Vrolijk ta referi ademas na conseho di Bezwaaradviescommissie LAR, cu segun dje a declara e bezwaar di MEP gegrond y a sostene cu e minister tin obligacion pa entrega e informacion solicita.

E parlamentario ta pone cinco pregunta central: ken a organisa e vuelo, kico tabata e costo total, cuanto e minister a paga personalmente, na ken e pago a wordo haci y ken a paga e resto di e gastonan.

Segun Vrolijk, un contestacion cla y documenta por pone fin na e discusion rapidamente. Su pregunta final ta si e minister ta dispuesto pa duna e claridad solicita.