Gobierno y AFTA ta fortalece proteccion di consumidor cu protocol nobo

ORANJESTAD – Minister di Finansa, Asunto Economico y Sector Primario, Geoffrey Wever, a firma un protocol di cooperacion entre Pais Aruba y Aruba Fair Trade Authority (AFTA), cu e meta di fortalece proteccion di consumidor y crea un funcionamento mas transparente y eficiente di mercado.

E acuerdo ta forma parti di implementacion di Landsverordening bestuursrechtelijke handhaving consumentenbescherming, cu a drenta parcialmente na vigor dia 15 di maart 2026.

Bao di e sistema nobo, AFTA ta responsabel pa supervision di cumplimento di normanan legal relaciona cu proteccion colectivo di consumidor, mientras cu DEACI ta trata kehonan individual, registracion di kehonan, informacion, conseho huridico y mediacion.

E protocol ta establece reglanan cla pa intercambio di informacion, coordinacion, supervision y proteccion di dato confidencial. Esaki mester conecta mihor tratamento di un keho individual cu accion mas amplio ora un problema ta afecta varios consumidor.

Un elemento importante ta Consuloket, e loket digital pa consumidor. AFTA lo financia y maneha e plataforma, mientras cu DEACI lo procesa e notificacionnan cu drenta via e sistema.

Segun Minister Wever, proteccion di consumidor ta un parti esencial di maneho economico, pasobra un mercado fuerte mester tin reglanan cla, institucionnan cu ta funciona y consumidor cu conoce nan derechonan.

E minister a enfatisa cu poder di compra no ta solamente relaciona cu prijs, sino tambe cu proteccion y acceso na informacion confiabel.

AFTA y DEACI lo reuni por lo menos cuatro biaha pa aña pa evalua e cooperacion, mientras cu e protocol mes lo wordo evalua anualmente.

Cu e acuerdo aki, Gobierno kier crea un mercado mas moderno y confiabel, caminda consumidor ta proteha, empresario conoce e reglanan y autoridadnan por actua mas rapido ora tin problema.