Gobierno ta amplia uso di auto electrico pa reduci gasto y dependencia di combustibel

ORANJESTAD – Gobierno di Aruba ta amplia electrificacion di su flota di vehiculo, incluyendo awor auto electrico pa ministernan, como parti di un transicion mas amplio pa un pais mas sostenibel, eficiente y menos dependiente di combustibel fosil.

Segun Minister di Finansa, Asunto Economico y Sector Primario, Geoffrey Wever, diferente departamento y compania estatal ya ta haciendo uso di vehiculo electrico, entre otro DEZHI, SEDECO, CBS, DTZ y Post Aruba. E siguiente paso ta inclui vehiculonan electrico pa Conseho di Minister, cu excepcion di Prome Minister Mike Eman.

Despues di un consulta di mercado y destaho publico, Green Wheels a wordo selecciona pa entrega e vehiculonan. E programa di gobernacion ta establece cu auto di trabou pa minister no mester ta mas caro cu EV of hybrid cu un balor di Afl. 70.000.

Segun datonan di CBS, e cambio por produci un spaarmento considerable. Durante e prome seis lunanan, gasto mensual di combustibel pa cada vehiculo a baha aproximadamente 70%, di un promedio di Afl. 1.500 pa Afl. 405.

Gobierno ta sostene cu electrificacion no solamente ta reduci costo y emision, pero tambe ta disminui dependencia di combustibel importa, algo importante pa Aruba como isla vulnerable pa fluctuacion internacional di prijs.

E transicion ta wordo sosteni ademas pa GO Programme, financia pa Union Europeo. Bao di e programa, Aruba ta preparando un plan pa electrificacion completo di fleta di Gobierno, incluyendo infrastructura di carga, maneho di bateria, impacto riba red electrico y maneho di compra.

Minister Wever ta sostene cu Gobierno mester lidera cu ehempel y transforma sostenibilidad di un vision den accion concreto cu beneficio duradero pa Aruba.