Arends-Reyes(AVP): Aruba mester priorisa calidad di bida den futuro turistico

ORANJESTAD – Parlamentario Jennifer Arends-Reyes, Presidente di Comision di Turismo di Parlamento, ta sostene cu Aruba mester determina su propio rumbo turistico cu un vision cu ta pone bienestar di comunidad, proteccion di naturaleza y calidad di bida na prome luga.

Despues di participa na e encuentro “How to Fix Tourism” organisa pa AHATA, Arends-Reyes a indica cu turismo lo sigui ta un pilar principal di economia, pero cu exito no mester wordo midi solamente den cantidad di bishitante.

Segun e, Aruba mester pasa di un modelo enfoca riba volumen pa uno cu ta crea mas balor pa pais y su pueblo. Esaki ta inclui estadia mas largo, mas gasto den economia local, proteccion di naturaleza y mas beneficio directo pa empresario y trahado local.

Arends-Reyes a enfatisa cu Aruba tin espacio y recursonan limita y cu infrastructura mester sostene tanto comunidad como turismo. P'esey, crecimiento mester wordo guia cu dato, planificacion y un vision pa largo plazo.

E parlamentario ta sostene cu progreso turistico mester traduci den mihor oportunidad di trabou, salario digno, mas espacio pa empresario local y inversion den districtonan.

Tambe el a menciona e necesidad di un strategia nacional cu inclui trafico, vivienda, recurso humano, proteccion di naturaleza y un balans entre hotelnan, short-term rentals y necesidadnan di comunidad.

Su mensahe central ta cu Aruba no por laga turismo crece sin direccion. “Turismo ta di Aruba, pero Aruba no ta solamente turismo,” Arends-Reyes a conclui.