Cuida Aruba a recoge 102 ton di desperdicio y amplia su enfoke pa limpieza structural

ORANJESTAD – E di dos edicion di Cuida Aruba a conclui cu 102 ton di desperdicio entrega y 26 localidad limpi den diferente bario, mientras CEDE ARUBA ta prepara e iniciativa pa evoluciona di un accion mensual pa un plataforma mas amplio di limpieza, educacion y conscientisacion.

Despues di evalua e prome edicion na juli, e organisacion a adapta su logistica. En bes di casi 26 punto di entrega, e di dos edicion a uza seis localidad strategico reparti riba e districtonan. Segun CEDE ARUBA, e cambio a permiti mas baki na cada sitio y un fluho mas eficiente.

Cuida Aruba ta enfoca tambe riba promocion di Zona di Desperdicio permanente na Barcadera, unda habitantenan por entrega desperdicio gratis di dialuna te cu diadomingo, di 7:00'or di mainta pa 3:00'or di atardi, cu excepcion di dianan di fiesta.

Durante e accion, CMO, DOW, Bureau City Inspector y Serlimar Aruba a colabora pa limpia 26 localidad den bario. Pa e siguiente edicion, programa pa 26 di september, e intencion ta pa boluntarionan, companianan, scolnan, organisacionnan y clubnan bolbe participa activamente.

CEDE ARUBA ta desaroya cuidaaruba.com cu e meta di transforma Cuida Aruba den un plataforma permanente basa riba tres pilar: promocion di Zona di Desperdicio, accionnan mensual di limpieza den bario y “Baki den Bario” mensual.