Respaldo ta logra tereno pa edificio nobo na Kibaima

ORANJESTAD – Fundacion Salud Mental Aruba Respaldo a logra un paso importante den realisacion di su edificio nobo, despues cu DIP a reserva oficialmente un tereno na Kibaima pa e proyecto.

Directora di Respaldo, Caroline Hart, a ricibi e carta oficial for di Minister di Infrastructura, Energia y Telecomunicacion, Rene Herdé. E paso ta resultado di colaboracion cu Minister di Salubridad, Asunto Social, Cuido di Adulto Mayor y Maneho di Adiccion, Mervin Wyatt-Ras.

E edificio nobo mester crea mas espacio pa amplia capacidad di Respaldo y permiti e fundacion ofrece mas y mihor servicio di salud mental den un ambiente moderno y adapta na necesidadnan di cuido.

E proyecto ta wordo realisa den colaboracion cu Fundacion Mama Ties, cu segun Respaldo ta hunga un rol esencial den haci e edificio realidad.

Minister Wyatt-Ras a indica cu e proyecto no ta solamente un soño di Respaldo, sino un aspiracion comparti pa un futuro mihor pa salud mental na Aruba.

Respaldo lo sigui traha hunto cu Gobierno, Fundacion Mama Ties y otro partnernan pa amplia y fortalece cuido di salud mental na Aruba.