Acuerdo cu OM ta kita obstaculo pa Mike de Meza bira ministeriabel

ORANJESTAD – E caso fiscal cu durante mas cu un aña a para den caminda di Mike de Meza pa bira minister den Gobierno AVP-FUTURO a yega na un buelta importante. Parlamentario di AVP a anuncia diamars atardi cu el a yega na un acuerdo cu Ministerio Publico (OM), bou di cual e lo paga Afl. 2.500 como transaccion, sin mester admiti culpabilidad pa e acusacion cu e no a cumpli debidamente cu su obligacionnan fiscal.

Segun De Meza y su cuerpo di abogado, e acuerdo tambe ta kita e obstaculo penal cu tabata impidi su screening como candidato pa un funcion ministerial. Conforme cu e informacion presenta durante conferencia di prensa, e situacion hudicial awor lo permiti cu De Meza por obtene e declaracion necesario den cuadro di screening y, consecuentemente, bolbe bira ministeriabel.

E desaroyo ta pone un posible punto final na un caso cu a cuminsa durante formacion di Gobierno AVP-FUTURO na principio di 2025.

Mike de Meza originalmente tabata scogi como candidato pa maneha e cartera di Infraestructura, Energia y Telecomunicacion. Sinembargo, su nombramento no por a sigui hunto cu e resto di gabinete na maart 2025, despues cu screening fiscal na Departamento di Impuesto (DIMP) a resulta problematico.

Durante e procedimiento cu a sigui, DIMP a indica cu De Meza y su esposa no tabatin tur declaracion fiscal entrega pa añanan 2020 y 2021. Tambe tabatin observacionnan tocante su comportamiento fiscal anterior. De Meza, di su banda, a sostene cu e asunto tabata resultado di diferencia di interpretacion y cu na e momento ey e no tabatin debe fiscal personal habri. Despues, segun informacion presenta den corte, e obligacionnan di declaracion y pago cu por a wordo regularisa a wordo cumpli.

De Meza a recurri na corte tratando di obtene un declaracion fiscal favorable, pero den juni 2025 Corte a determina cu e no tabata competente pa obliga DIMP entrega tal declaracion. Corte a considera e cartanan di DIMP como informacion pa formateur, y no como un decision administrativo contra cual por apela den e procedimiento ey.

E CASO DESPUES A BIRA MAS SERIO.

Durante e screening a sali cu Ministerio Publico tabata tratando De Meza como sospechoso den un investigacion penal relaciona cu asunto fiscal, despues di un denuncia proveniente di autoridad fiscal. E condicion aki tabata un problema adicional pa su nombramento como minister, pasobra bou di Landsverordening Integriteit Ministers, screening hudicial ta forma parti di e proceso pa un candidato minister.

De Meza a inicia diferente procedimiento tratando di obliga OM pa duna mas claridad tocante exactamente di kiko e tabata sospechoso. Finalmente Hof a conclui den oktober 2025 cu OM tabata actuando dentro di su competencia y cu, durante un investigacion penal, Ministerio Publico no tabata obliga pa revela mas informacion cu loke ley ta exigi na e fase ey.

Mientrastanto, AVP no por a sigui spera y Rene “Baba” Herde a wordo nombra como minister, completando gabinete AVP-FUTURO.

Den 2026 e investigacion contra De Meza a drenta un fase nobo. Ministerio Publico a presenta un proposicion di transaccion, algo cu De Meza inicialmente no a acepta. Na juni NoticiaCla ya a reporta cu e parlamentario ainda tabata evaluando e oferta di OM.

Na juli, defensa di De Meza a indica publicamente cu, despues di rechasa un oferta anterior, OM tabata preparando pa hiba e asunto dilanti corte, cu un audiencia programa pa 24 di augustus. Defensa a sostene cu no tabatin suficiente base factual ni huridico pa un caso penal contra De Meza.

E ANUNCIO DI DIAMARS 11 DI AUGUSTUS CAMBIA E ESCENARIO.

Segun De Meza y su abogadonan, awor tin un acuerdo definitivo cu OM pa paga Afl. 2.500 como transaccion, mientras cu De Meza no ta admiti culpabilidad pa e acusacion cu e no a cumpli cu su obligacionnan fiscal.

E diferencia ta importante: un transaccion no ta mescos cu un sentencia di culpabilidad dicta pa un juez. Conforme cu loke defensa a presenta, solucion di e asunto tambe ta elimina e impedimento cu e investigacion penal tabata crea den su screening.

Politicamente, esaki por tin consecuencia considerable.

Mike de Meza a perde su oportunidad pa drenta Gobierno AVP-FUTURO na 2025 precisamente mientras e proceso fiscal y penal tabata pendiente. Si su situacion judicial awor ta completamente regularisa y e por pasa e screening rekeri, un obstaculo importante pa un futuro nombramento ministerial ta desaparece.

Esaki no ta nifica automaticamente cu De Meza lo bira minister. Un nombramento ainda ta un decision politico y constitucional. Pero e problema cu durante mas cu un aña a mantene su candidatura ministerial blokia, segun su defensa, awor a haya solucion.

Ministerio Publico ainda no a publica, un comunicado cu confirma tur e condicionnan presenta durante e conferencia di prensa di De Meza. Un otro punto tambe ta cu a evalua si ta bay Corte, y cu si bay Corte y gana, y cu Ministerio Publico apela, esaki por keda un trayectoria di 4 aña, y ningun hende ta warda riba esey, segun e ekipo di defensa di de Meza. Noticia ta den desaroyo.