ANALISIS | ‘Ban bolter cos’: pero pueblo ta sintiendo e cambio?

Scirbi pa Tito Laclé

Gobierno actual a gana eleccion cu un mensahe cla: “Ban bolter cos.” E promesa tabata pa cambia e rumbo di nos pais, pone orden y haci cosnan funciona mihor. Pero algo mas cu un aña despues, e pregunta ta cada biaha mas relevante: pueblo ta sintiendo realmente cu cosnan a bolter?

REVITALISACION DI ORANJESTAD

E problema cu ta sali dilanti den e proceso di revitalisacion di Oranjestad ta un bon ehempel. Inversionistanan ta indica cu nan ta cla cu propiedad, financiamiento y plan, pero e proceso y aprobacionnan ta tarda. Esey no ta un caso aisla. Den diferente sector tin keho tocante servicio y tramite na instancia manera Censo, DIMAS, DTI y otro departamento publico, unda retraso y bottleneck ta sigui afecta e ciudadano y empresa.

PLANTA MATA Y VERF CAS

Na mes momento, Gobierno ta hopi presente cu proyectonan visible: planta mata, palo, drecha espacio publico, verf cas y otro iniciativa cu ta bon pa imagen di Aruba. Tur esey por tin su balor. Pero e problema ta cuminsa ora e cosnan visible ta aparenta di haya mas prioridad cu e problema structuralnan cu ta frena funcionamiento diario di pais.

Gobierno no por bira gerente di cada detaye. Si e nivel politico ta micromanage demasiado, mientras departamentonan importante no tin suficiente capacidad, e autoridad of proceso eficiente pa ehecuta, e resultado ta hustamente traduci den mas retraso. E tarea principal di Gobierno mester ta juist pa pone e sistemanan funciona, establece prioridad y responsabilisa esnan cu mester ehecuta cos.

E resultado preliminar di e encuesta politico di NoticiaCla tambe ta duna un señal importante. Aunque e encuesta ainda ta den proceso y no por wordo considera un veredicto final, e prome reaccionnan ta mustra cu tin un grado di desatisfaccion y duda tocante direccion y funcionamiento di Gobierno. E sentimiento ey ta cuadra cu e preocupacionnan cu ta wordo expresa den diferente sector di comunidad.

No ta falta di actividad cu ta e problema. Ta falta di resultado sintibel den e areanan cue  ciudadanonan ta confronta diariamente.

Un cas pinta ta facil pa mira. Un palo of mata nobo  planta tambe. Pero un DIMAS cu ta funciona mihor, un Censo cu ta move mas lihe, un permiso cu no ta pega pa lunas na DIP, of un inversion cu por avansa sin burocracia innecesario: ESEY ta e tipo di cambio cu pueblo realmente ta sinti.

“Ban bolter cos” tabata un slogan fuerte. Awo e reto ta pa Gobierno demostra cu e no tabata solamente un slogan electoral.

Pasobra, na final di cuenta, no ta solamente Oranjestad cu mester revitalisacion. E funcionamento di Gobierno mes tambe mester wordo revitalisa.