FBI ta investiga agencia di biahe despues cu grupo a yega Aruba sin reservacion

ORANJESTAD – Un caso di posible fraude cu un agencia di biahe na Merca tin un conexion directo cu Aruba, despues cu un grupo di biahero a yega na e isla y a descubri cu nan reservacion di hotel no tabata valido.

Segun reportahe di medio na Chicago, Katherine Jones-Young y su famia a paga FlyGirl World Travel pa un biahe pa Aruba. Su cas so a paga mas cu US$5.500. Pero ora e grupo a yega na resort na Aruba, nan a haya sa cu e reservacion a wordo cancela pa falta di pago.

E biaheronan a keda obliga pa paga miles di dollar adicional pa por haya habitacion despues cu nan a yega Aruba. Segun Jones-Young, anteriormente e tabatin un experiencia positivo cu e mesun agente di biahe, locual a haci e situacion mas dificil pa compronde.

E caso di Aruba ta parti di un cantidad mas grandi di keho contra FlyGirl World Travel. FBI su division na Chicago ta actualmente busca posible victima y ta indica cu e compania aparentemente a ricibi pago di cliente, cancela reservacion y despues no a devolve e placa.

Entre otro caso tin un boda na Mexico cu cerca di 75 invitado, unda e perdida total segun e pareja a pasa US$180.000, y biahenan pa Egipto y Jamaica cu tampoco a materialisa.

E cliente tambe ta sospecha cu e operacion por a bolbe aparece bou di un otro nomber comercial. Te awor FBI no a anuncia acusacion criminal relaciona cu e caso.

E experiencia di e grupo na Aruba ta sirbi como advertencia pa biaheronan: no basta cu haya un confirmacion di un agente. Ta recomendabel pa verifica directamente cu hotel, aerolinea of otro proveedor si e reservacion realmente ta existi y si pago a wordo procesa.