INVESTIGA | Gobierno ta anuncia, pero ehecucion ta keda atras; Parti 1 — E problema

ORANJESTAD – Gobierno por tin plan, anuncia proyecto y firma acuerdo. Pero finalmente, pa e ciudadano y empresario tin un pregunta cu ta conta: e cos ta wordo haci si?

NoticiaCla ta cuminsa un serie investigativo riba un problema cu ta sali dilanti cada vez mas den Aruba: e distancia entre decision politico y ehecucion den practica.

Nos no ta trata di bisa cu Gobierno no a logra nada. Tin departamento cu ta reporta progreso y tin iniciativa cu a wordo implementa. E pregunta ta si Aruba tin un problema mas structural di ejecucion y coordinacion.

Un ehempel ta revitalisacion di Oranjestad.

Oranjestad Investment Group (OIG) a indica recientemente cu inversionistanan priva  a cumpra propiedad caba, regla financiamiento y prepara plannan architectonico, tecnico y comercial. Gobierno a reuni cu e grupo y a firma un Letter of Intent pa coopera.

Sinembargo, segun OIG, diferente aprobacion y accion concreto ainda no a materialisa. Resultado ta cu proyectonan por keda stanca mientras costo y incertidumbre ta aumenta.

Esaki ta mustra e diferencia entre intencion y ejecucion.

Un gobierno por bisa cu e kier revitalisa Oranjestad. Pero si un inversionista cu placa cla y proyecto prepara no por sigui pasobra decision administrativo ta falta, e politica riba papel no ta cambia ciudad.

E mesun pregunta por wordo haci den otro area di Gobierno: cuanto proyecto, permiso of decision ta actualmente wardando aprobacion di otro departamento, un minister of un instancia?

Y ken ta controla cu e proceso realmente ta sigui?

Pa un isla chikito manera Aruba, coordinacion entre departamentonan teoreticamente mester ta mas facil. Si proceso toch ta keda pega entre diferente instancia, tin motibo pa investiga unda e sistema ta faya.

Pasobra retraso administrativo no ta solamente inconveniencia.

Pa un empresario e por significa rente y interes sin ingreso. Pa un ciudadano, luna di incertidumbre. Pa Aruba, e por significa inversion cu no sosode, actividad economico perdi y menos confiansa den Gobierno.

Den parti 2, NoticiaCla ta investiga unda den e aparato publico proceso por ta tranca y si demasiado decision ta depende di nivel politico.