NoticiaCla ta lansa INVESTIGA riba di peticion di lector

ORANJESTAD – NoticiaCla ta sigui scucha su lectornan. Un di e mensahenan cu a sali na cla for di e reciente encuesta di NoticiaCla ta e deseo pa mira mas periodismo investigativo: noticia cu no solamente ta conta kico a pasa, pero cu ta busca pakico e ta pasa, ken ta responsabel y cua ta e consecuencia pa Aruba.

Nos a scucha.

Como prome resultado concreto di e peticion aki, NoticiaCla ta introduci INVESTIGA, un serie periodistico dedica na profundisa den temanan cu ta toca interes publico.

E intencion no ta pa busca sensacion ni señala culpabelidad sin evidencia. INVESTIGA lo busca hecho, documento, cifra, contradiccion y respuesta. Unda tin pregunta, nos kier busca e contesta. Y unda Gobierno, institucion of otro instancia tin un explicacion, nan tambe mester haya oportunidad pa duna esaki.

Nos ta consciente cu periodismo investigativo ta exigi tempo y trabou. Pero nos ta kere cu un medio di comunicacion no mester solamente informa pueblo di loke ta pasa awe. E tin tambe responsabilidad di sigui pregunta ora algo no ta cuadra.

E prome investigacion ta cuminsa awor.

Den un serie di tres parti, NoticiaCla INVESTIGA lo pone atencion riba un pregunta cu ta afecta ciudadano, empresario y inversionista: Gobierno ta anuncia y tuma decision, pero con efectivo e ta logra converti nan den resultado?

Nos lo mira e distancia entre intencion y ejecucion, unda proceso por ta keda pega den aparato publico y finalmente con promesa di cambio mester wordo midi contra resultado concreto.

Esaki ta solamente e cuminsamento.

E encuesta a duna nos lector un oportunidad pa bisa NoticiaCla kico nan kier mira mas di nos.

Boso a papia. Nos a scucha. Awor nos ta investiga.