Croes: 49 aña despues, Aruba ta recorda “Augustus Scur” y lucha pa Status Aparte

ORANJESTAD – Parlamentario Endy Croes a conmemora awe 49 aña desde e sucesonan di 11 di augustus 1977, conoci como “Augustus Scur”, un periodo importante den lucha politico di Aruba pa Status Aparte.

Den su reflexion, Croes ta recorda cu e sucesonan a sigui despues cu 83% di votadonan a expresa nan apoyo pa Status Aparte den referendum di maart 1977. Mas laat e mesun aña, tension politico y sindical a aumenta despues cu MEP a keda afo di Gobierno Central Antiano.

Dia 10 di augustus a proclama un welga general y dos lider sindical a wordo deteni. E siguiente dia, Aruba a keda sin coriente, mientras forza policial special for di Corsou a wordo manda Aruba durante e disturbionan. E confrontacionnan a resulta den violencia y persona herida.

Segun Croes, e sucesonan a contribui pa pone e demanda di Aruba mas claramente riba agenda na Hulanda. Dia 19 di augustus 1977, Gobierno Hulandes a indica cu e tabata dispuesto pa ricibi un delegacion Arubano pa dialoga tocante futuro estatal di e isla.

E proceso eventualmente a conduci na acuerdo riba Status Aparte den 1983, cu Aruba a implementa oficialmente dia 1 di januari 1986.

Croes ta usa e conmemoracion pa enfatisa cu, segun e, autonomia di Aruba ta resultado di un lucha historico y sacrificio di diferente generacion, y cu e historia mester wordo transmiti na generacionnan futuro.